Rusiye bergi inspektsiyası Yaltadaki «Skazka» ayvanat bağçasınıñ qapatıluvı aqqında mart 16-da tizilgen protokolını keri qaytardı.
Bu aqta mart 18-de ayvanat bağçasınıñ saibi Oleg Zubkov bildirdi.
«Tünevin bergi inspektsiyası, ğaliba, «artqa aldı». Apayım Oksana Olegovnağa Yaltadaki ayvanat bağçasına telefon ettiler ve ayttılar ki, o, kelip protokolnı ala bile ve ayvanat bağçasınıñ qapatıluvı boyunca mahkeme olmaycaq. Mart 17-de kündüz bergi inspektsiyasında bir şey oldı, ve olar «artqa aldı». Bellesem, ayvanat bağçasından şimdilik basmanı yoq etip oldıq. Küreşimizni devam etecekmiz», – dep bildire Zubkovnıñ sözlerini «Qırım.Aqiqat».
İş adamınıñ bildirgenine köre, mart 16-da tizilgen protokolğa binaen, Yalta bergi inspektsiyası «Skazka» ayvanat bağçasını 90 künge qapatmağa planlaştırğan edi, bunen beraber, bergi inspektsiyası «Yaltalı «Skazka» ayvanat bağçası» müdiresi Olga Pirojkovanı ekiden üç yılğa qadar müddetke vazifesinden boşatacaq edi.
Bundan evel Zubkov haber etti ki, mart ayında «Taygan» arslan bağçası ve Yaltalı «Skazka» ayvanat bağçasınıñ müflis oluv ceryanı başlanuvı aqqında ilân ete bile.
Bergi inspektsiyası mart 16-da Yaltadaki «Skazka» ayvanat bağçasını parkka biletlerde yetmegen malümat içün qapattı.
Avdetniñ bildirgenine köre, Oleg Zubkov İstanbul civarında dünyada eñ yahşı ayvanat bağçalarından birini açmağa planlaştıra.
Hatırlatamız ki, Oleg Zubkov Türkiye vatandaşlığını almaq içün vesiqalarnı berdi.
Bunen beraber o, Ukraina Yuqarı Radası deputatı, belli qırımtatar uquq qoruyıcısı ve dissidenti Mustafa Cemilevniñ Türkiye ükümet strukturasındaki bağlarını qullanmaq ve yardımını almaq azır olğanını ilân etken edi.
İçtimaiy ağlarda Facebook,Vkontakte,Odnoklassniki saifelerimizge, bunen beraber,Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
