Topraq tayması neticesinde bozulğan Aqmescit-Aqyar (Simferopol-Sevastopol) yolunıñ bir qısmı (Belbek (Fruktovoye) köyünden Mekenzi dağlarına yoquş) kün-künden ziyade bozula. Ve bu yerde iç tamir işleri alıp barılmay.
Aydayıcılar içtimaiy ağlarda bu yerniñ fotoresimlerini paylaşa.
Aqyar akimiyetinde haber ettiler ki, qazaiy-tüzetme tamir işleri çoq vaqıt alacaq. Bundan evel teşkerüv işlerini alıp barmaq kerek.
Aynı vaqıtta Qırım sakinleriniñ bazıları tahmin ete ki, yerli akimiyet asfalt tolusınen bozulacağını bekley, yañıdan yolnı yapmaq içün.
Avdetniñ evel bildirgenine köre, şimdiki vaqıtta yolnıñ bu qısmında Aqyar yönelişinde naqliye areketi yasaqlanğan, şeerden ise, bir yolaqta areket etile. «Sevastopolskiy avtodor» müessisesiniñ müdiri Vitaliy Uzlovnıñ malümatına binaen, topraq tayması areketi belgilendi, o ziyadeleşe. Körüne ki, yol bozula, yaqında qoylğan yolda da çatlaqlar peyda ola. Şimdiki vaqıtta tayğan yerniñ teşkerilüvi boyunca işler alıp barıla.
Hatırlatamız ki, bu künleri Aqyar-Yalta yoluna büyük taş yıqıldı.
Foto: Avtopartner Krım | DTP DPS PDD
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
