Kiyevde Devlet Dumasınıñ sabıq deputatı Denis Voronenkov öldürildi

23.03.201715:20

Kiyevde Ukrainağa cinaiy iş açılğanı içün qaçqan Rusiye Devlet Dumasınıñ sabıq deputatı Denis Voronenkov öldürildi.

Bu aqta Kiyev politsiyası başı Andrey Krişenko bildirdi. Onıñ sözlerine köre, bu, sımarlanğan öldürüv ola bile.

«Vesti Ukraina» neşriniñ bildirgenine köre,  Voronenkov «Premier-Palace» musafirhanesi yanında öldürildi. Neşirniñ malümatına binaen, eki aqay kişi öldürildi, olardan biri Voronenkov oldı.

«Ukrainskaya pravda» haber ete ki, Kiyev merkezinde atışma yüz berdi, neticede eñ azdan bir adam elâk oldı, amma neşir adlarnı bildirmey. Tasdıqlanmağan malümatqa binaen, bir kişi öldürildi, digeri yaralandı. Krişenkonıñ sözlerine köre, Voronenkovnıñ muafızı ücüm etken adamnı yaraladı, o ise, muafıznı yaraladı.

Devlet Dumasınıñ sabıq deputatı İlya Ponomaröv Facebook saifesinde yazdı ki, Denis Voronenkov onen körüşüvge kete edi. Onıñ sözlerine köre, öldürüv yerli vaqıtnen saat 11:25-te yüz berdi.

Ukraina prezidenti Petro Poroşenko Ukraina Havfsızlıq hızmeti yolbaşçısı Vasiliy Gritsaknı özüne çağırdı, dep bildire «Meduza».

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

 вороненков1
Фото аватара

Автор: Редакция Avdet

Редакция AVDET