Aqmescitte turaqta maşnanen urulğan qadın hastahanede vefat etti

24.03.20179:50

Mart 8-de Aqmescitteki (Simferopol) Pobedı caddesinde yerleşken cemaat naqliyesi turağında yüz bergen qaza neticesinde zararlanğan qadın hastahanede vefat etti.

Bu aqta Qırım Cumhuriyeti Yol areketi havfsızlığı devlet inspektsiyası (YAHDİ) bildire.

Qaza saat 18:20-de Zuyskaya turağında yüz berdi. Volvo avtomobiliniñ aydayıcısı adamlarnı urdı, turaqnı bozdı. Qazada eki adam zararlandı: 39 yaşındaki qadın ve 16 yaşındaki qız. Olar turaqta naqliyeni beklep tura edi. Fevqulade vaziyetler nazirliginde bildirdiler ki, daa bir aqay kişi hastahanege barmaqtan vazgeçti.

YAHDİ-de haber ettiler ki, mart 20-de 39 yaşındaki qadın hastahanede vefat etti.

İçki işler nazirliginiñ cinayetlerni taqiq etüv boyunca bölügi bu qaza boyunca teşkerüv keçire.

Bundan evel bildirilgenine köre, qaza Pobedı caddesi ve Keçkemetskaya soqağınıñ çatışmasında yüz berdi. Şaatlarnıñ sözlerine köre, Volvo aydayıcısı saruş edi.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Фото аватара

Автор: Редакция Avdet

Редакция AVDET