«Hizb ut-Tahrir» işi boyunca Aqmescitte (Simferopol) yaqalanğan Teymur Abdullayev yaqınlarına qırımtatar tilinde mektüp yazğanı içün kartserge qapatıldı.
Bu aqta adliyeci Emil Kurbedinov bildirdi.
Kurbedinovnıñ malümatına binaen, onıñ kamerasında teşkerüv keçirilgende Abdullayev yaqınlarına yazğan ve SİZO poçtası vastasınen yollaycaq olğan tuvğan, qırımtatar tilinde yazılğan mektüp tapıldı. Abdullayevden bu mektüpni aldılar, o bunıñ oña qaytarılmasını talap etmege başlağanda, onıñ ricası red etildi, ve ayttılar ki, rus tilinden ğayrı, başqa bir tilde mektüp yazmaq yasaqtır, bundan soñ onı kartserge qapattılar.
«Ana tilinde mektüp yazmaqnı biñ qanun yasaq etsin, amma bu insan esas qanuniy aqqını boza! Er kesniñ ana tilinde laf etmek ve yazmaq aqqı bar!» – dep ayttı Kurbedinov.
Avdetniñ evel bildirgenine köre, oktâbr 13-te Aqmescitteki Kiyev rayon mahkemesi oktâbr 12-de evlerinde keçirilgen tintüvlerden soñ yaqalanğan beş qırımtatarnı apiske qapattı. Olar Rusiyede terroristik tanılğan «Hizb ut-Tahrir» teşkilâtınen bağlı olğanınen şeklenile.
Olar Aqmescit civarındaki qasabalarda yaşay ve evlerinde yaqalandı: Teymur Abdullayev, Uzeir Abdullayev ve Ayder Saledinov – Mamaq köyü (Strogonovka); Rustem İsmailov ve Emil Cemadinov – Bavurçı qasabası (Kamenka).
Taqiqatnıñ fikrince, Qırımda «Hizb ut-Tahrir» bölüginiñ teşkilâtçısı Teymur Abdullayev oldı: oña qarşı Rusiye Federatsiyası Cinaiy kodeksiniñ 205.5-ci maddesi 1-ci qısmı («Rusiye Federatsiyası qanunlarına binaen terroristik tanılğan teşkilâtnıñ faaliyetini teşkil etüv») boyunca cinaiy iş açıldı. Qalğan dört kişi aynı bu maddeniñ ekinci qısmı boyunca qabaatlana (olar terroristik teşkilâtta iştirak etüvnen şeklenile).
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
