Mart 27-den başlap, «Bıstraya poçta» («Tez çalışqan poçta») naqliye şirketi Qırım yarımadasında işini toqtattı.
Bu aqta malümat şirketniñ resmiy saytında bildirile.
Faaliyet toqtatıluvınıñ sebebi, şirketniñ yükleri ve parası hırsızlanğanı oldı. Müessisege büyük zarar ketirgen ve işini devam etmege bermegen hırsızlıq Aqyar (Sevastopol) şeeriniñ terminalında yüz berdi.
«Uquq qoruyıcı organlarına etilgen muracaat boyunca cinaiy iş açıldı, lâkin, şimdiki vaqıtqa qadar taqiqat iç muvafaqiyetli neticeler bermedi», – dep bildirdiler «Bıstraya poçta»da.
Şirketniñ malümatına binaen, Aqmescit (Simferopol) ve Aqyardaki şirket bölükleri aprel 7-ge qadar yükni tarqatacaq.
«Müşterilerimizden afu soraymız ve işbirlik içün teşekkür bildiremiz», – dep ayttılar «Bıstraya poçta»da.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
