Ruslan Zeytullayev açlıq ilân etti

04.04.201715:44

Rostov-na-Donu şeerindeki apiste bulunğan «Hizb ut-Tahrir» işi boyunca yaqalanğan Ruslan Zeytullayev müddetsiz açlıqnı ilân etti.

Bu aqta onıñ adliyecisi Emil Kurbedinov bildirdi.

Onıñ sözlerine binaen, Ruslan Zeytullayev mahkemeniñ bütün terkibine işanmağanı ve onı red etkeni aqqında ilân etti, amma bu şefaat qanaatlendirilmedi.

«Bundan soñ o, Qırım territoriyasında qırımtatarlar taqip etilgeni munasebetinen, vatandaş faalleri taqip etilgeni ve onıñ cinaiy işi siyasetnen bağlatılğanı munasebetinen açlıq ilân etkenini bildirdi», – dep haber etti Kurbedinov.

Zeytullayev açlıqnıñ toqtatılması içün bir qaç talabını bildirdi. Birinci: Bütün qırımtatarlarnıñ ekstremizm, terrorizm, «fevral 26 işi» maddeleri boyunca cinaiy işlerini toqtatmaq. Ekinci: Ukraina Tışqı işler nazirligine Rostov-na-Donu şeerindeki №1-ci SİZO-ğa şahsiy körüşüv içün kirmege ruhset bermek. Üçünci: Umumiy nizam koloniyalarında bulunğan üç Ukraina vatandaşı boyunca Şimaliy-Qavqaz arbiy okrug mahkemesiniñ qararını lâğu etmek. Dörtünci: Onıñ ve bu cinaiy iş boyunca yaqalanğan daa üç kişiniñ Ukraina devletine, bu devletniñ vatandaşları olaraq, teslim etilmesi.

Avdetniñ evel bildirgenine köre, prokuror «Aqyarlı dört kişi» işi boyunca mahkemeniñ Ruslan Zeytullayevge nisbeten qararına şikâyet arizasını berdi. Evel o, Zeytullayevni 17 yılğa qattı nizam koloniyasına qapatmağa talap etken edi. Dekabr 27-de Rusiye Federatsiyası Yuqarı mahkemesi prokurornıñ şikâyetini qanaatlendirdi ve «Hizb ut-Tahrir» bölügini teşkil etkeninen qabaatlanğan Ruslan Zeytullayevniñ işini Rostov-na-Donu şeerindeki Şimaliy-Qavqaz arbiy okrug mahkemesine yolladı.

Rostov-na-Donu şeerindeki arbiy mahkeme «Hizb ut-Tahrir» işi boyunca yaqalanğanlar boyunca üküm çıqardı. Böyleliknen, terroristik faaliyetni teşkil etkeninen qabaatlanğan Ruslan Zeytullayev 7 yılğa apiske qapatıldı, Ferat Sayfullayev, Rustem Vaitov, Nuri Primov 5 yılğa umumiy nizam koloniyasına tüşti.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Фото аватара

Автор: Редакция Avdet

Редакция AVDET