Qırım iş adamı Oleg Zubkovğa Yaltalı «Skazka» ve «Taygan» arslan bağçasını qıtaiy Ukrainağa, Herson vilâyetine keçirmege teklif etildi.
Bu aqta aprel 4-te Qırım Muhtar Cumhuriyeti kurort ve turizm sabıq naziri Aleksandr Liyev Kiyevde keçirilgen matbuat konferentsiyasında ilân etti.
«Taygan» bağçası ve «Skazka» ayvanat bağçasınıñ tesisçisine, bizim Qırım iş adamı Oleg Zubkovğa, Herson vilâyetine keçmege teklif etildi. Uquq qoruyıcılarnıñ separatizm meselesinen bağlı suallerge cevap bermek: o qayda oldı, qayda olmadı. Eñ soñ alda, şartlı müddet almaq ve sevimli işni buña ihtiyac olğan territoriyada devam etmek», – dep ayttı Liyev.
Qırım iş adamı Oleg Zubkov ilân etti ki, oña ukrain tarafından iç teklif kelmegen edi, dep bildire «Qırım.Aqiqat».
«İç aqiqiy teklif olmadı. Bu, kurort ve turizm sabıq naziri Liyev iştirak etken adiy bir yayın edi, o yerde bunı teklif etti. Amma bunıñ yapılması imkânsızdır. Nasıl etip ayvanat bağçasını keçireceksiñ? Onı kim Qırımdan yiberecek ve o yerge kirmege kim ruhset berecek? Men bağçalarımnıñ inkişafı boyunca er angi tekliflerni baqam, amma olğan bağçalarğa zarar ketirmesin. Çünki olğan bağçalarnı iç bir yerge keçirip olamazsıñ», – dep ayttı o.
Zubkov qayd etti ki, o, Türkiyedeki leyhağa daa çoq diqqat ayıra.
Avdetniñ bildirgenine köre, bergi inspektsiyası mart 16-da Yaltadaki «Skazka» ayvanat bağçasını parkka biletlerde yetmegen malümat içün qapattı. Lâkin, bundan soñ Rusiye bergi inspektsiyası Yaltadaki «Skazka» ayvanat bağçasınıñ qapatıluvı aqqında mart 16-da tizilgen protokolını keri qaytardı.
Oleg Zubkov İstanbul civarında dünyada eñ yahşı ayvanat bağçalarından birini açmağa planlaştıra.
Hatırlatamız ki, Oleg Zubkov Türkiye vatandaşlığını almaq içün vesiqalarnı berdi.
Bunen beraber o, Ukraina Yuqarı Radası deputatı, belli qırımtatar uquq qoruyıcısı ve dissidenti Mustafa Cemilevniñ Türkiye ükümet strukturasındaki bağlarını qullanmaq ve yardımını almaq azır olğanını ilân etken edi.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
