İnternet ağında Ahtem Seytablyaevniñ «Başqasınıñ duası» («Onıñ yüregi» iş adınen belli) filminiñ treyleri peyda oldı.
Video «Medianânâ» saytında yerleştirildi.
Saundtrek olaraq Jamalanıñ belli «1944» yırı saylandı.
Qırımtatar qadını Sayde Arifovağa bağışlanğan «Başqasınıñ duası» filmi mayıs 18-de Kiyevdeki «Ukraina» kinoteatrinde taqdim etilecek.
Ekinci cian cenki vaqtında almanlar Qırımnı işğal etken seneleri yüzge yaqın yeudi balasını qurtarğan qırımtatar qadını Sayde Arifova aqqındaki «Başqasınıñ duası» filmi ukrain tilinde yapılğan. Amma filmde alman, qırımtatar ve rus tilleri de eşitilecek. Film büceti – 31 million grivna. Bu paradan 10 million grivnanı ukrain devleti ayırdı. Qalğan para, qanunğa köre, film boyunca işler yekünlengen soñ ayırılacaq.
Film Qırım manzaralarını hatırlatqan Gürcistanda, bundan da ğayrı, Kiyevde ve İsrailde çıqarıldı.
Odessa halqara kinofestivalinde işbu film leyhası ilk mukâfatnı aldı – Work in progress eñ yahşı leyhası içün «Rozetka» internet-tükânından 10 biñ grivna sertifikatı.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
