Qırımtatar mezarlığında yüz bergen vandalizm aqqında malümat şübe doğurdı

19.04.201715:37

Keriç civarındaki Bagerovo köyünde musulman mezarlığında vandalizm yüz bergeni aqqında aprel 18-de kütleviy haber vastalarınıñ bazılarında peyda olğan malümat şübeli oldı.

Qırımtatar resurs merkezi, yerli sakinlerniñ arasındaki işanılacaq şahsiy menbağa esaslanıp, bildirdi ki, aprel 17-de belli olmağan şahıslar qırımtatar (musulman) mezarlığında baştaşlarda boyanen resimler yaptı ve qoralarnı bozdı. Bunen beraber, resurs merkezi tek bir baştaşnıñ eki tarafından çıqarılğan fotoresimini paylaştı.

Lâkin, Avdet böyle malümatnı ögrendi ki, yerli sakinler, akimiyet, diniy erbaplar bu kibi bir şey eşitmedi. Qırım müftiyatında da vandalizm aqqında malümatnı tasdıqlamadılar. Qırım musulmanları diniy idaresi (QMDİ) matbuat hızmeti, Yedi Quyu rayon imamı Rustem Memetovnıñ sözlerine esaslanıp, haber etti ki, yerli qırımtatar faalleri malümatnı teşkermek içün mezarlıqqa bardı, amma olar da vandalizm izlerini körmedi.

Qırımtatar milliy areketi iştirakçisi Nariman Celâl aqşam vaziyetni biraz açıqladı. O, añlattı ki, qırımtatar faallerinden biri olğan yerli sakin de, onıñ ricasınen, mezarlıqqa bardı ve vandalizm izlerini tapmadı. Celâl bildirdi ki, biraz vaqıt keçken soñ, üstünde yeşil boyanen resim yapılğan baştaşnı körgen fotoresimniñ müellifini tapıp oldılar. Aqay kişi kiyevinen beraber mezarlıqta bulunıp, boya qurumasın ve taşta qalmasın dep, onı benzin vastasınen sildi. Hususan bunıñ içün kimse vandalizm yüz bergenini tasdıqlap olamadı.

«Bunı körgen adamlar tanığan vatandaşınıñ mezarını temizlemekni boyun borcu olğanını saydı. Ve yahşı ki, iç olmasa, fotoresim yaptılar. Bunen beraber, musulman olıp, hayırlı iş yapqanları aqqında bildirmedi ve olarnıñ adlarını aytmamağa rica ettiler. Amma er aytqan sözüni tasdıqlamağa azırlar», – dep yazdı Nariman Celâl Facebook saifesinde.

Bunen beraber o, qayd etti ki, boyalanğan baştaşnı körgen aqaylar bu aqta uquq qoruyıcı organlarına bildirmedi, çünki Qırımda bundan evel yüz bergen bir sıra vandalizm vaqialarından iç biri taqiq etilmedi.

Eñ müthiş vandalizm vaqiaları 2008 senesi yüz berdi. O vaqıt belli olmağan şahıslar Seitlerdeki (Nijnegorskiy) merkeziy musulman mezarlığında aman-aman bütün baştaşlarnı bozdı. Bir qaç ay keçken soñ vandalizm vaqiası Aqmescit civarındaki Acı Qal (Çistenkoye) köyünde yüz berdi. Cinayetçiler mezarlıq qorasında ksenofob yazısını qaldırdı, bunen beraber, qorada darağaç ve qırımtatar halqınıñ timsali olğan tamğanıñ sızılğan şekilde resimini yaptı. Belli olmağan şahıslar mezarlıq qorası yanında 4 hristian çemberini qaldırdı. O sefer mezarlıqta 40 baştaş bozuldı.

Avdetniñ evel bildirgenine köre, Gurzufta «Artek» bala lageri reberiyetiniñ emirinen «Gurzuf-aziz» qadimiy musulman mezarlığı yoq etilip başladı.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Фото аватара

Автор: Редакция Avdet

Редакция AVDET