Qırım ükümeti yolbaşçısı Sergey Aksönov aprel 20-de ilân etti ki, Qırım federal universiteti rektorı Sergey Doniç öz isteginen istifağa çıqmaq içün ariza bermeli.
Bu aqta «Krıminform» bildire.
Aksönovnıñ sözlerine köre, o, Doniçniñ bu vazifede bulunğanında onen işbirlik tutmağa devam etmesini «imkânsız saya».
«Fikrimce, Doniç efendi öz isteginen istifağa çıqmaq içün ariza bermeli. Qırım federal universitetinde işlerniñ böyle devam etmesi mümkün degil, vaziyetni tamamınen deñiştirmek kerek. Yazıq ki, rektornıñ siyasetine ve şahsen oña işanç yoq», – dedi Aksönov.
O, qayd etti ki, universitet memuriyetine bundan evel «diger ükümet organlarından belli bir gunahları içün» işten boşatılğan adamlar işke alındı.
Sergey Doniç 2014 senesi Qırım federal universitetiniñ rektorı oldı. Bundan evel Doniç Qırım Muhtar Cumhuriyeti ükümeti baş naziriniñ muavini edi.
İçtimaiy ağlarda Facebook, Vkontakte,Odnoklassniki saifelerimizge, bunen beraber,Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
