Bağçasarayda Ruslan Zeytullayev içün dua etildi

24.04.201710:30

Bağçasarayda SİZO-da endi eki aftadan ziyade açlıq tutqan Ruslan Zeytullayev içün dua etildi.

Dua merasiminiñ teşebbüsçisi Seydamet Mustafayev oldı, o, aprel 23-te Bağçasarayda 10 kün memuriy yaqalavdan soñ azat etildi.

«Birinciden, em Qırımdan, em de bütün qıtaiy qısımdan apiste bulunğan qardaşlarım içün dua etem. Olar, apiste on künden ziyade buluna. Bunen beraber, cesaret kösterip, endi eki afta devamında aşamağan Ruslan Zeytullayev içün ayrıca dua etem. O, özü ve menfaatları içün degil de, qardaşlarını qasevetlenip, olarnı azat etsinler, dep açlıq ilân etti. Allah ondan razı olsun. Ve Allah er kesni qorantalarına qaytarsın», – dep ayttı Seydamet Mustafayev onıñ qaytqanını qayd etmek içün evine kelgen adamlarğa.

Prokuror Gennadiy Truhanov Ruslan Zeytullayevni Rusiyede yasaq etilgen «Hizb ut-Tahrir» teşkilâtında iştirak etkeni içün qabaatlav boyunca 17 yılğa apiske qapatmağa talap etti. Ruslan Zeytullayev qabaatını tanımadı, onıñ imayesi mahkemeden onı, areketlerinde cinayet olmağanı içün, azat etmege talap etti. Onıñ işi boyunca qarar aprel 26-da seslendirilecek.

Aprel 4-te Zeytullayev, qırımtatarlarnıñ taqip etilmesini toqtatmaq ve çıqarılğan mahkeme qararlarını lâğu etmekni talap etip, açlıq ilân etti.

Ruslan Zeytullayev 2015 senesi yanvar ayında Aqyar (Sevastopol) rayonında «Hizb ut-Tahrir» teşkilâtınıñ bölüginde iştirak etkeninde şeklenilip yaqalandı. Onen beraber Ferat Sayfullayev, Rustem Vaitov ve Nuri Primov yaqalandı, taqiqat olarnı yasaq etilgen teşkilâtnıñ iştirakçileri olğanını ayttı.

Avdetniñ evel bildirgenine köre, prokuror «Aqyarlı dört kişi» işi boyunca mahkemeniñ Ruslan Zeytullayevge nisbeten qararına şikâyet arizasını berdi. Evel o, Zeytullayevni 17 yılğa qattı nizam koloniyasına qapatmağa talap etken edi. Dekabr 27-de Rusiye Federatsiyası Yuqarı mahkemesi prokurornıñ şikâyetini qanaatlendirdi ve «Hizb ut-Tahrir» bölügini teşkil etkeninen qabaatlanğan Ruslan Zeytullayevniñ işini Rostov-na-Donu şeerindeki Şimaliy-Qavqaz arbiy okrug mahkemesine yolladı.

Rostov-na-Donu şeerindeki arbiy mahkeme «Hizb ut-Tahrir» işi boyunca yaqalanğanlar boyunca üküm çıqardı. Böyleliknen, terroristik faaliyetni teşkil etkeninen qabaatlanğan Ruslan Zeytullayev 7 yılğa apiske qapatıldı, Ferat Sayfullayev, Rustem Vaitov, Nuri Primov 5 yılğa umumiy nizam koloniyasına tüşti.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Фото аватара

Автор: Редакция Avdet

Редакция AVDET