Aprel 24-te, tahminen saat 21:00-de Aqmescitte (Simferopol) Kiyevskaya soqağında şeklenilgen insanlarnı taşığan politsiya maşnasınıñ iştiragi ile qaza yüz berdi. Maşna aydayıcısı yüksek suratnen areket etip, KİA avtomobiline uruldı ve onı 10 metr ögge taşıdı.
Qaza şaatlarınıñ sözlerine binaen, yük maşnası çatışmadan bir qaç saniye evel sirenanı çalıştırdı. Politsiya maşnası çet yol şeritinde kete edi ve toqtamağa tırışmadı bile.
«Acele yardım maşnası tahminen yedi daqqadan soñ keldi. Bu yük maşnası, az qaldı, meni uracaq edi, artımdaki KİA maşnasınıñ aydayıcısı ise yetiştirmedi, o, onı eki kere urdı», – dep yazdı qaza şaatı «Avtopartner» gruppasında.
Üç daqqa içinde bu yerge daa bir qaç politsiya maşnası keldi. Şaatlar haber etti ki, zararlanğan adayıcı sağ qaldı.
«Yigitniñ başı, ğaliba, yaralandı, qan bar edi, amma o, acele yardım kelmezden evel maşnasından çıqarılmağan edi», – dep qayd etti qomşu avtomobilniñ aydayıcısı.
Foto: «Avtopartner.Krım»
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
