Avropa parlamenti azaları Rusiye ükümetini «Hizb ut-Tahrir» işi boyunca mahküm etilgen Ruslan Zeytullayevni qıtaiy Ukrainağa keçirmege çağırdı.
Bu aqta rusiyeli mühbir Anton Naumlük tarafından Facebook saifesinde paylaşılğan vesiqada aytıla.
«Biz (Avropa parlamenti deputatları, – Avdet) rusiyeli […] ükümetten Ruslan Zeytullayevge ukrain konsullarınıñ serbest yiberilmesini ve onıñ Ukrainağa keçirilmesini talap etemiz. Ruslannıñ endi üç afta devamında açlıq tutqanını köz ögüne alıp, onı acele şekilde tibbiy baquv ve tedaviylevnen teminlemege talap etemiz», – dep aytıla beyanatta.
Avdetniñ evel bildirgenine köre, Şimaliy Qavqaz okrug arbiy mahkemesi «Hizb ut-Tahrir» işi boyunca yaqalanğan Ruslan Zeytullayevni Rusiye Federatsiyası Cinaiy kodeksiniñ 205.5 maddesi 1-ci qısmı (Rusiyede terroristik tanılğan teşkilâtnıñ faaliyetini teşkil etüv) boyunca qabaatlı olğanını tanıdı ve onı qattı nizam koloniyasında bulunma şartınen 12 yılğa apiske qapatmaq qararını çıqardı.
Qarar çıqarılğan soñ, Zeytullayev ilân etti ki, 22 kün devam etken açlıqnı toqtata, çünki onı bunı yapmağa onıñ soy-sop ve yaqınları, qırımtatar halqınıñ yetekçileri ve nufuzlı temsilcileri, adliyeciler, bunen beraber, lâqayt olmağanlar rica ete. Bunen beraber o ayttı ki, bu, onıñ birinci tutqan açlığı, amma soñki degil.
Aprel 4-te Zeytullayev, qırımtatarlarnıñ taqip etilmesini toqtatmaq ve çıqarılğan mahkeme qararlarını lâğu etmekni talap etip, açlıq ilân etti.
Prokuror Gennadiy Truhanov Ruslan Zeytullayevni Rusiyede yasaq etilgen «Hizb ut-Tahrir» teşkilâtında iştirak etkeni içün qabaatlav boyunca 17 yılğa apiske qapatmağa talap etti. Ruslan Zeytullayev qabaatını tanımadı, onıñ imayesi mahkemeden onı, areketlerinde cinayet olmağanı içün, azat etmege talap etti.
Ruslan Zeytullayev 2015 senesi yanvar ayında Aqyar (Sevastopol) rayonında «Hizb ut-Tahrir» teşkilâtınıñ bölügini teşkil etkeninde şeklenilip yaqalandı. Onen beraber Ferat Sayfullayev, Rustem Vaitov ve Nuri Primov yaqalandı, taqiqat olarnı yasaq etilgen teşkilâtnıñ iştirakçileri olğanını ayttı.
Avdetniñ evel bildirgenine köre, prokuror «Aqyarlı dört kişi» işi boyunca mahkemeniñ Ruslan Zeytullayevge nisbeten qararına şikâyet arizasını berdi. Evel o, Zeytullayevni 17 yılğa qattı nizam koloniyasına qapatmağa talap etken edi. Dekabr 27-de Rusiye Federatsiyası Yuqarı mahkemesi prokurornıñ şikâyetini qanaatlendirdi ve «Hizb ut-Tahrir» bölügini teşkil etkeninen qabaatlanğan Ruslan Zeytullayevniñ işini Rostov-na-Donu şeerindeki Şimaliy-Qavqaz arbiy okrug mahkemesine yolladı.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
