Jamalanıñ «Eurovision» yarışında iştirak etkeni boyunca masraflar cedveli, qaysı birine onıñ ücreti olğanı aytıldı, aqiqatta onıñ üç sanalaştırmasınıñ fiyatından ibaret, yırcı ise, bedava yırlay.
Bu aqta Jamalanıñ PR-müdiri Denis Kozlovskiy bildirdi.
Hatırlatamız ki, evel ProZorro portalı malümatnı paylaştı ki, oña köre, Jamala «Eurovision» yarışında iştirak etkeni içün 985 500 grivna alacaq.
Kozlovskiy añlattı ki, bu raqam Jamalanıñ üç sanalaştırmasınıñ fiyatı ola.
«Bu saada çalışqan adamlar uquq şahısları degil. Yazılğan çalğı taqımı resmiy olaraq yoq – bu cıyma taqımı resmiy olaraq qayd etilmegen eñ yahşı çalğıcılardan ibaret. ProZorro sistemasına kirsetilecek ve mına böyle çalğı taqımı, ve mına onıñ ücreti, dep yazılacaq uquq şahısı yoq. Aqiqaten, bu bücetke baqsañız, körersiñiz ki, Jamalanıñ ücreti anda iç te yoq. Jamala «Eurovision»da bedava yırlay. Bu million grivna ise, üç sanalaştırmanıñ fiyatı ola», – dep qayd etti Kozlovskiy.
Avdetniñ evel bildirgenine köre, Kiyevde «Eurovision-2017» halqara yır yarışınıñ birinci yarım finalı keçirildi. Bu basamaqta 18 yırcı iştirak etti.
Ukrain yırcısı Jamala «Eurovision-2017» birinci yarım finalında sanağa çıqtı. O, eki yırnı icra etti: «Zamanili» ve «1944».
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
