Momine Aliyevanı vahşiycesine öldürgeninde qabaatlı tanılğan 31 yaşındaki Eski Qırım sakini Aleksey Gnezdilovnı 1 yıl ve 9 ayğa serbestlikni sıñırlav ve 20 biñ ruble para cöremesi ile 18,5 yılğa apiske qapatmaq ükümi çıqarıldı.
Böyle qararnı Qırım Yuqarı mahkemesi çıqardı.
Gnezdilov Rusiye Federatsiyası Cinaiy kodeksiniñ bir qaç maddesi boyunca qabaatlı tanıldı: 131-ci maddeniñ 1-ci qısmı (namusına keçüv), 132-ci maddeniñ 1-ci qısmı (diger seksual areketler), 105-ci maddeniñ 2-ci qısmı «z, k» maddeleri (seksual zorbalıq areketleri ile öldürüv) ve digerleri.
Bunen beraber, mahküm etilgen kişi, ölgen qadınnıñ soyuna maneviy zarar ketirgeni içün, 3 million ruble para cöremesinen cezalandı. O, qattı nizam koloniyasında bulunacaq.
«Mahküm etilgen kişi keçken sene aprel-mayısta eki qadınnıñ cınsiy serbestligine qarşı cinayetler yapqanı, olardan birini, onıñ altın ilvanlarını hırsızlap, öldürgeni belgilendi. Bundan da ğayrı, onıñ yaşağan yerinde tintüv keçirilgende patlatıcı alet tapıldı», – dep aytıla cumhuriyet nezaret müessisesi matbuat hızmetiniñ beyanatında.
2016 senesi mayıs ayında İslâm Terek (Kirovskoye) rayonındaki Tamğacı (İzümovka) köyünde qırımtatar qadını Momine Aliyeva vahşiycesine öldürildi. Ölgen qadınnıñ ağa-qardaşları tükânlarnıñ birinde olğan kameranıñ videolarından esas şeklenilgen şahısnıñ maşnasını belgilep oldı.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
