Qırımtatarnıñ evinde keçirilgen tintüv devamında kene de ğayıp olğan kişiniñ izleri qıdırıldı

22.05.201716:05

Mayıs 22-de Yedi Quyu (Lenino) sakini Nadir Mambetşayevniñ evinde tintüv keçirildi.

Ev saibiniñ sözlerine köre, tintüv tahminen on-on eki maskalı ve silâlı adam tarafından keçirile edi.

Tintüv çerçivesinde uquq qoruyıcılar yasaqlanğan edebiyat, narkotik, silâ qıdırdı, bunen beraber, ev saibi Rusiyede yasaq etilgen «İslâm Devleti» teşkilâtınen bağlımı ya da yoq, dep meraqlandı. Tintüv sebebi, keçken bir qaç vaqialarda kibi, ğayıp olğan Aqmescit (Simferopol) sakini Memetov Enver Rustem oğlu oldı.

Tintüv keçirilgen vaqıtta uquq qoruyıcılar Mambetşayevden Floberniñ patronları içün revolver aldı.

Mambetşayev bildirdi ki, silânı bir qaç yıl evel aldı ve, Ukraina qanunlarına binaen, bu pıştav içün vesiqalar talap etilmegen edi.

Tintüv keçirilgen soñ, aqay kişi parmaq ve ayaqqap izleri alınması içün rayon bölügine alıp ketirildi.

Qayd etmek kerek ki, Mambetşayev balası ve 80 yaşındaki anasınen yaşay, qadın içün bu bir şok oldı.

Avdetniñ evel bildirgenine köre, Qırımda soñki ay devamında qırımtatarlarnıñ evlerinde keçirilgen bir qaç tintüv ğayıp olğan Enver Memetovnen bağlı edi, o, aydut taqımınıñ iştirakçisi olğanınen şeklenile. Böyleliknen, onıñ izleri Aqmescit civarındaki Mamaq (Strogonovka) köyünde Riza İzetovnıñ evinde ve Tofik Abdulgaziyevniñ evinde qıdırıldı. Anton Naumlükniñ malümatına binaen, ğayıp olğan Memetovnıñ işinen bağlı tintüvler daa çoq oldı, amma olarnıñ iştirakçileri bu aqta bildirmege qorqa.

İçtimaiy ağlarda Facebook, Vkontakte,Odnoklassniki saifelerimizge, bunen beraber,Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Фото аватара

Автор: Редакция Avdet

Редакция AVDET