Ruhiy-lingvistik ekspertiza qırımtatar faali Suleyman Kadırovnıñ izaatında separatizm alâmetlerini belgilemedi.
Bu aqta adliyeci Cemil Temişev bildirdi.
«Ekspert cevap berdi ki, işbu izaatta milletlerara munasebetlerni ve Rusiye topraq bütünligini bozmaq çağıruvlar yoq. Bunen beraber, işbu izaatta Suleyman Kadırovnıñ saifesinde paylaşılğan videonıñ alğışlanuv alâmetleri bar», – dep qayd etti Temişev.
Adliyeciniñ malümatına binaen, FSB taqiqatçısı Kadırovğa nisbeten ruhiy ekspertizanıñ keçirilmesini avale etti.
«Zenaatdaşlarımıznen toplaşıp, tevsiyeleşecekmiz ve Suleyman Kadırovnıñ özüni diñleycekmiz. Bu umumiy muzakerelerden soñ bu ekspertizanıñ keçirilmesi boyunca soñ qarar alacaqmız», – dep ayttı Temişev.
2016 senesi oktâbr 5-te rusiyeli uquq qoruyıcılar qırımtatar faali Suleyman Kadırovnıñ evinde tintüv keçirdi. Neticede ondan noutbuk ve telefon alındı. Bundan soñ FSB hadimleri Suleyman Kadırovnı lingvistik ekspertizanıñ keçirilmesi aqqında qararnen tanış etti, işbu ekspertiza çerçivesinde nasıldır Demyan Demyançenkonıñ video muracaatı ögrenilecek, qaysı biri tübünde Kadırov sanki izaat yazdı. Kadırov Rusiye sıñırlarını tanımamağa çağırğanınen ve «Asker» qırımtatar taqımına qol tutqanınen qabaatlandı.
Aprel 3-te Qırım faali ve uquq qoruyıcı Suleyman Kadırov ilân etti ki, o, ekstremistler cedveline kirsetildi. Bunen beraber, onıñ yekâne kelir menbası ile bank kartı blok etildi, dep bildire «Qırım.Aqiqat».
Avdetniñ evel bildirgenine köre, Qırımnıñ İçki (Sovetskiy) rayonı sakini Rustem Mennanov Rusiye Memuriy qanun bozuvı aqqında kodeksiniñ 13.15-ci maddesi 2-ci qısmına (kütleviy haber serbestligini suistimal etüv) binaen qabaatlana.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
