İçki (Sovetskiy) mahkemesi Qırım faali Rustem Mennanovnı içtimaiy ağda Qırımtatar Milliy Meclisini (Rusiyede 26.04.2016 mahkeme qararınen yasaq etilgen) añğan beyanatı içün 2 biñ ruble para cöremesinen cezaladı.
Bu aqta Mennanovnıñ adliyecisi Fevzi Karakaş bildirdi.
«Mahkeme başlanğan soñ, men bozuv olmağanı içün davanıñ toqtatılması aqqında şefaat arizasını bergen edim, mahkemeci bunı köz ögüne almadı. Memuriy mesüliyetke celp etüv müddeti yekünlengeni sebebinden davanıñ toqtatılması aqqında ekinci şefaat arizası da diqqatqa alınmadı», – dep izaat berdi Karakaş.
Rustem Mennanov mahkeme qararına şikâyet etecek ola.
Avdetniñ bildirgenine köre, 2016 senesi sentâbr 29-da Rusiye Yuqarı mahkemesi Qırımtatar Milliy Meclisiniñ ekstremistik cemaat teşkilâtı olğanını tanıdı ve onıñ faaliyetini Rusiye Federatsiyası territoriyasında yasaq etti.
Aprel 27-de Avropa birligi işbu qararnıñ «umumen olaraq qırımtatarlarnıñ aqlarına ciddiy ücüm» olğanını ayttı.
2016 senesi iyün 29-da Birleşken Milletler Teşkilâtınıñ insan aqları boyunca baş kâtibiniñ yardımcısı İvan Şimonoviç Rusiye Yuqarı mahkemesini Meclis faaliyetiniñ yasaqlanmasını lâğu etmege çağırdı. Mayıs 12-de Avropa parlamenti Avropa Birligi aza devletlerine Meclis faaliyetiniñ yasaqlanuvı içün mesüliyetli olğanlarğa nisbeten sanktsiyalar kirsetilüvi imkânını baqmağa teklif etti.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
