Üç Qırım mektep talebesi, Eskender Paşayev, Asan Asanov ve Maksim Romançuk, Mental arifmetika boyunca halqara olimpiadada iştirak etip, öz kategoriyalarında çempionlar oldı.
Oğlanlar «ISMA» mental arifmetika halqara mektebinde derslerge qatnay. Mental arifmetika boyunca olimpiada iyün 4-te Almata şeerinde (Qazahistan) keçirildi. Yarışta tahminen biñ bala iştirak etti.
Çempionlarnıñ biri, Aqmescit (Simferopol) akademik gimnaziyasınıñ talebesi, 8 yaşındaki Eskender Paşayevniñ adı Avdet gazetasınıñ oquyıcılarına endi tanış. 
Bu, Eskender Paşayevniñ birinci büyük ğalebesi degil. Avdetniñ evel bildirgenine köre, keçken sene o, rus tili ve edebiyatı olimpiadasınıñ şeer basamağında birinci yer aldı.
Bundan da ğayrı, oğlan ilmiy konferentsiyalarda iştirak ete. 2015 senesi o, cumhuriyet seviyesinde «Salğır ve onıñ ekologik meseleleri» işinen ğalebe qazandı. 2016 senesi onıñ «Qırımda pamuq östürmesi» işi Obninsk şeerine bütün Rusiye basamağına yollanılğan edi, o yerde ekinci yer aldı.
Mental arifmetika – bu, arifmetik esaplama vastasınen aqıl qabiliyetleri ve icat potentsialını inkişaf etüv programmasıdır. Mental arifmetika tez esaplamağa ögretmekten ğayrı, analitik qabiliyetlerni de inkişaf ete.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
