Rusiyeli içtimaiy-siyasiy mevzularda yazğan yazıcı ve uquq qoruyıcı Aleksandr Podrabinekniñ qırımtatar faali İlmi Umerovnıñ davası boyunca cemaat imayecisi olaraq iştirak etmesi içün razılıq berildi.
Bu aqta Umerovnıñ qızı Ayşe haber etti, dep bildire «Radio Svoboda».
«İmaye tarafı belli dissident ve uquq qoruyıcı Moskvalı Aleksandr Podrabinekniñ cemaat imayecisi olaraq mahkeme ceryanına kirsetilüvi aqqında şefaat arizasını berdi. Mahkeme, prokurornıñ narazılığına baqmadan, Podrabinekke davada iştirak etmek imkânını berdi», – dep bildirdi o.
Hatırlatamız ki, iyün 7-de Aqmescit (Simferopol) rayon mahkemesi İlmi Umerovnıñ davasını baqıp başladı.
Avdetniñ evel bildirgenine köre, mayıs 12-de FSB taqiqatçıları İlmi Umerovğa nisbeten ekstremizm aqqında madde boyunca cinaiy iş açtırdı.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
