İyün 13-te Hersonda keçirilgen kontsert devamında ukrain «Okean Elzi» gruppasınıñ lideri Svâtoslav Vakarçuk qırımtatar bayrağını köterdi.
«Okean Elzi» «Dünya turı 2016-2017» çerçivesinde final kontsertlerini keçire, gruppa endi 30 devlette ve tahminen yüz şeerde kontsert taqdim etip, Ukrainağa qayttı.
Avdetniñ evel bildirgenine köre, keçken sene Svâtoslav Vakarçuk «Ses» leyhasından öz şegirti ile, qırımtatar bayrağını açıp, «Obiymi» («Quçaqla») yırınıñ bir qaç satırını qırımtatar tilinde yırladı.
Belli ukrain «Okean Elzi» gruppası Qırımda soñki sefer 2013 senesi iyün 20-de kontsertni taqdim etti. O vaqıt Aqmescitte olarnı diñlemek içün tahminen 10 biñ adam toplaştı. Kontsertten soñ Vakarçuk Twitterde seyircilerge üç tilde, yani qırımtatar, ukrain ve rus tillerinde, teşekkür bildirdi.
Foto: Viktoriya Kvitka
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
