Foto: Ali Memetov
Qırımtatar bayrağı kününe bağışlanğan merasimler bu sene açıq avada Aq Qaya dağınıñ eteginde yerleşken «Kovboy» at bazasında keçirildi.
Faaller yaşlar içün kvestni teşkil etti. Gençler nevbetteki basamaqlarğa keçmek içün qırımtatar bayrağı aqqında şiirler ayta, tapmacalarğa cevap tapa, ev qurma leyhalarını ve diger şeylerni yapa edi.
Bundan da ğayrı, teşkiliy komitet «Bayraq-ring» aqıl oyunını azırladı, oyunda yaşlar qırımtatar halqınıñ tarihı, medeniyeti, adetleri saasındaki bilgilerini taqdim etti.
Elbet, bayramnıñ baş timsali qırımtatar bayrağı oldı.
Merasim musafirleriniñ aytqanlarına köre, olar, yaşlarnı bir bayraq tübünde birleştire bilgen bu kibi kütleviy bayramlarğa muhtac.
«Çoqtan böyle toplaşmağan edik. Böyle merasimler, şübesiz, birleştire. Bu bayramda çeşit qırımtatar birleşmeleriniñ gençleri bulunğanı quvandıra. Biz çaptıq, oynadıq, küldik, bilgi aldıq, iç mefküreviy, siyasiy noqta-i nazarlarnı qarışmadan. Yeter ki, bizden episi öz halqı içün bir şeyler yapa. Bu bayramda farqlı gençler bar: kimse balalarımızğa terbiye bere, kimse qırımtatar tilinde ilâveler işlep çıqara, kimse şiir ve eserler yaza, kimse milliy küreşnen oğraşa, kimse hayriye faaliyetini alıp bara, kimse milliy kütleviy haber vastalarını inkişaf ettire, kimse milliy hand-made yapa ve digerler… Er kesten bir tamçı, bu ise deñizge çevirile. Bu pek güzel. Er kes elinden kelgenini yapa. Bu, vatanperverliktir», – dep bayram musafirlerinden biri Avdetnen fikir paylaştı.
Bayram merasimi soñunda faaller pilâv pişirdi.
Avdetniñ evel bildirgenine köre, bu sene Bayraq kününe bağışlanğan merasimlerni Aq Qaya eteginde MİLLET! VETAN! QIRIM!, Qardaşlıq gençler teşebbüs taqımları ve diger qırımtatar faalleri teşkil etti.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.