«Hizb ut-Tahrir» işi boyunca Yaltada yaqalanğan altı kişiniñ davasını alıp barğan Qırım taqiqatçıları iyül 8-ge qadar taqiqatnı yekünleycek ola.
Bu aqta iyün 27-de yaqalanğan kişilerniñ adliyecisi Aleksandr Popkov bildirdi.
«Taqiqat alıp barılğanda adamnı bir yarım yıldan ziyade izolâtorda tutmaq mümkün degil, bunıñ içün taqiqatçılar ya adamlarnı azat etmek, ya taqiqatnı yekünlemek ve malümatnı mahkemege teslim etmek kerek. Taqiqatçı bizge haber etti ki, kelecek afta iyül 8-ge qadar taqiqatnı yekünleycek ve soñki qararnı taqdim etecek», – dep bildire «Qırım.Aqiqat» Popkovnıñ sözlerini.
O, qayd etti ki, dava baqılması Rostov-na-Donu arbiy mahkemesinde başlana bile.
«Rusiye qanunlarına binaen, terrorizm aqqında bütün davalar, bu cümleden, terroristik teşkilâtta iştirak etüv, qaysı birinen imaye etkenimiz kişiler qabaatlana, bir qaç arbiy mahkemede, bu cümleden, Moskva ve Rostov okrug mahkemelerinde baqıla bile. Bu, «Hizb ut-Tahrir» işi boyunca Aqyarda (Sevastopol) yaqalanğan dört kişinen oldı. Oleg Sentsovnıñ davası da anda baqıldı», – dep añlattı adliyeci.
«Hizb ut-Tahrir işi» boyunca Yaltada ilk qabaatlanğanlar 2016 senesi fevral 11-de yaqalandı. Olardan eñ belli olğan – İnsan aqları boyunca kontakt gruppasınıñ azası Emir-Üsein Kuku. Ondan ğayrı, qurucı olaraq çalışqanlar Aluştalı Muslim Aliyev ve Qızıltaş (Krasnokamenka) köyü sakini Enver Bekirov, bunen beraber, çiçekler satqan Yaltalı Vadim Siruk yaqalandı.
Qızıltaş (Krasnokamenka) köyüniñ sakinleri Refat Alimov ve Arsen Cepparov 2016 senesi aprel 18-de tintüvler keçirilgen soñ yaqalandı. Olar Rusiye Federatsiyası Cinaiy kodeksiniñ 205.5 maddesi 2-ci qısmı boyunca (Rusiyede terroristik tanılğan teşkilâtnıñ faaliyetinde iştirak etüv) qabaatlana.
Avdetniñ bildirgenine köre, «Hizb ut-Tahrir» işi boyunca yaqalanğan, davaları daa devam etken qırımtatarlar, mahkeme daa qarar çıqarmağanına baqmadan, terrorist ve ekstremistler cedveline kirsetildi.
İşbu cedvelde Emir-Üsein Kuku 3415 sanlı, Muslim Aliyev – 468, Arsen Cepparov – 2294, Rustem İsmailov – 2884, Ayder Saledinov – 5199, Refat Alimov – 524, İnver Bekirov – 1231, Zevri Abseitov – 196, Rustem Abiltarov – 188, Enver Mamutov – 3994, Remzi Memetov – 4135, Vadim Siruk – 5362, Teymur Abdullayev – 110, Uzeir Abdullayev – 111 nomeri boyunca qayd etilgen.
Aynı bu cedvelge «Hizb ut-Tahrir» işi boyunca yaqalanğan Aqyarlı dört kişi kirsetildi, 2016 senesi sentâbr ayında olarğa qarşı qarar çıqarıldı.
Belli ki, 2016 senesi mayıs ayında «Hizb ut-Tahrir» işi boyunca yaqalanğan kişilerniñ apayları ve yaqınları «Qırım birdemligi» cemaat areketini teşkil etti. Onıñ idarecisi vazifesine yaqalanğan Ruslan Zeytullayevniñ apayı Meryem Zeytullayeva, idareciniñ yardımcısı vazifesine ise, yaqalanğan Muslim Aliyevniñ apayı Naciye Aliyeva saylandı.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
