Efsaneviy qırımtatar kişi Musa Mamutnıñ oğlu Yunusnıñ qorantası maddiy taraftan ağır vaziyette buluna.
Bu aqta mühbir ve bloger Zair Akadırov Facebook saifesinde bildirdi.
Musa Mamutnıñ kelini ve çağına yetmegen torunlarından ibaret olğan aile o, özüni yaqqan evde yaşay. O vaqianı öz közünen körgen Yunus Mamut üç yıl evel, 49 yaşında olıp, ağır hastalıqtan vefat etti.
Onıñ üç oğlu qaldı: Musa (13 yaşında), Enver (12 yaşında) ve Sabri (5 yaşında). Apayı Elnara balalarını östürmek içün eki işte çalışa.
Musa Mamut Qırımğa qaytqan soñ 1975 senesi satın alğan Aqmescit rayonındaki Beş Terek (Donskoye) köyünde yerleşken ev şimdiki vaqıtta yaramay alda buluna. Temeli kiçik olğanı ve çoq yıl keçkeni sebebinden bina bozulıp başlay.
«Yunus ağa, sağ olğanda, binanı, bozulmasın dep, armaturanen qaviyleştirmege yetiştirdi. Er alda, acele tamirge muhtac olğan damnı da tüzetir edi. Amma o, endi yoq…», – dep añlattı bloger Zair Akadırov.
Evniñ bazı odalarında bulunmaq, kerçekten de, havflı oldı. Evde kiçik balalar yaşağanı köz ögüne alınıp, bu meseleniñ çezilmesi Mamut qorantasında ilk sırada turmaqta.
Mütehassıslarnıñ tahminlerine köre, damnı tamir etmek içün 700 biñ ruble kerek olur.
Zair Akadırov, Mamut qorantası yaqınlarınıñ sözlerine esaslanıp, añlattı ki, keçenlerde Beş Terek köyüne Türkiye, Almaniyadan musafirler kelgen edi. Olar, evni tamirleycek ve buña para ayıracaq dep, söz bergen edi. Amma bu tek sözde qaldı.
Bloger pervasız olmağan vatandaşlarğa qorantağa maddiy taraftan yardım etmege, qurucılarğa ise meseleniñ çezilmesine qoşulmağa teklif etti.
«Keliñiz, qırımtatar halqınıñ tuvğan topraqta yaşaması içün öz ömrüni bergen Musa ağa Mamutnıñ tuvğanlarına yardım eteyik», – dep çağırdı Akadırov.
Yardım etmege istegenler Dilâra Mamutnen (Musa Mamutnıñ qızı) bağlana bile. Telefon nomerası: +7 (978) 880 98 63.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
Musa Mamutnıñ qızı Dilâra hanım torunlarınen
