İyül 26-da Qırım Yuqarı mahkemesinde sorğuğa çekilgen vaqıtta qırımtatar faali Ahtem Çiygoz ilân etti ki, 2014 senesi fevral 26-da keçirilgen mitingniñ teşkil etilmesinen oğraşmadı.
Bu aqta adliyeci Nikolay Polozov bildirdi.
«Meclisniñ toplaşuvından soñ (2014 senesi fevral 25, – Avdet) Ahtem Çiygoz evge, Bağçasarayğa ketti. O, aqşam ve gece kimsege telefon etmedi, kimsege haber etmedi ve, qabaatlavda aytılğanı kibi, regional meclisler azalarına adamlarnıñ mitingde iştirak etmelerini teminlek kerek olğanı aqqında haber etmek içün iç areket etmedi», – dep aytıp berdi Polozov Çiygoznıñ sözlerini, bildire «Qırım.Aqiqat».
Tünevin, iyül 25-te, dava devam etken bütün vaqıt içünde Ahtem Çiygoz ilk sefer sorğuğa çekildi.
Avdetniñ evel bildirgenine köre, Ahtem Çiygoz Aqmescit SİZO-sında 2015 senesi yanvar ayından başlap buluna, o, Rusiye Federatsiyası Cinaiy kodeksiniñ 212 maddesi 1-ci qısmı («kütleviy nizamsızlıqnı teşkil etüv») boyunca qabaatlana, madde boyunca qabaatlanğan kişi 10 yılğa qadar apiske qapatıla bile.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
