Soñki üç ay devamında Serene Sea cemaat areketi Qırım yalılarında 160 yunus balığı ölgenini qayd etti.
Bu aqta Serene Sea biologı Anastasiya Korosteleva bildirdi.
Onıñ sözlerine köre, er kün areket iştirakçilerine telefon vastasınen 5-6 kere yaralanğan ya da ölü yunus balığı aqqında haber etile.
Korosteleva qayd etti ki, esasen Balıqlava rayonında azovkalar öle. Serene Sea iştirakçileri eñ yaqın vaqıtta ekspeditsiya çerçivesinde o yerge barıp, vaziyetni ögrenmege planlaştıra.
Keriçte bu müddet devamında 21 ölü yunus balığı tapıldı. Bunen beraber, biolognıñ haber etkenine köre, Qara deñizniñ çeşit rayonlarında ölgen yunus balıqları aqqında malümat bildirile.
«Elimizde olğan malümatqa köre, ekosistema sağlam olmağanını eminliknen aytmaq mümkün, ve adamlar tamam şimdi onı qorçalap başlamasa, eñ yaqın vaqıtta em Qara deñizni, em de onıñ güzel yunus balıqlarını de coya bilemiz», – dep ayttı biolog.
Avdetniñ bildirgenine köre, bir ay evel Kefe (Feodosiya) yalılarınıñ birinde ölgen yunus balığı tapıldı, belli olmağan şahıslar oña ağır beton taşnı bayladı. Prokuratura cinayetçilerni tapmaq içün faaliyet alıp bara.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
