Aqmescitniñ (Simferopol) Jeleznodorojnıy mahkemesi, 14 avgust künü yaqalanğan Yarikul Davlatovğa 10.000 para cezası belgiledi.
«Kırım.Aqıqat» bildirgenine kore, mahkeme keçirilgen vaqıtta Yarikul Davlatov, çıqarılğan qararnen öz narazılığını bildirdi.
Mahkeme devamında, qarşı qavede çalışqan ve davada şaatlıq etken Rustam Kuvatov aytqanına kore, «Yarikul Davlatov, sesini çıqarmayıp, plakatnen 15 daqqa qadar turdı, soñ onı polıs hadimleri tutıp ketti».
Polıs hadimi Artem Minin ise, öz başına pikette turğan insannı Pavlenko, 2 soqağında Yuqarı mahkeme yanında körgenini ayttı.
«Bu adam pasportını kösterdi, din arqadaşına qol tutqanını añlattı. Biz onı polis bölügine teklif ettik, o red etmedi», ˗ dedi Minin.
Mahkemeci ise, piket vaqtında Yarikul Davlatov ne yerde olğanını anıqlap başladı ve tükânğa, ya da mahkemege yaqınca olğanını soraştırdı. R. Kuvatov, piketçini evge yaqın, yolaq üstünde turğanını ayttı, polis hadimi ise, aksine, mahkemege yaqın yerleşkenini bildirdi.
Tünevin, 14 avgust künü, S. Karametovğa qol tutıp, öz başına piketke dört insan çıqtı. Polis hadimleri olarnı yaqaladılar, soñ ise azat ettiler. Esli – başlı Yarikul Davlatovğa ise, memüriy protokol tizdiler.
Avdetniñ haber etkenine kore, Aqmescitniñ (Simferopol) Jeleznodorojnıy mahkemesi 9 avgust künü qırımtatar milliy areketniñ faalini Server Karametovnı Rusiye Memuriy Qanun bozuvlar aqqında Kodeksniñ 19.3 maqalesiniñ 1-ci qısmı «Polis hadiminiñ qanuniy emirine boysunmaması» boyunca qabaatlı tanıp, 10 künge memuriy apiske mahküm etti.
Hatırlatamız, qart qırımtatar faaline qarşı eki memuriy protokol tizdiler. Olardan birisine köre, Rusiye Memuriy Qanun bozuvlar aqqında Kodeksniñ 20.2 maqalesi boyunca «bir insan keçirgen piketlerniñ tertibini bozğanı içün», ekincisi – «Polis hadiminiñ qanuniy emirine boysunmaması» içün. Ekincisine köre, Karametovnı qabaatlı tanıp, mahkeme 10 biñ ruble para cezasını berdi.
İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.
