www.avdet.org

Noyabrde qırımtatarlar arasından bir gruppa Milliy Meclis yolbaşçılığına qarşı çıqıp, oña ‘impiçment’ ilân etti. Neticede bu areket bütün qırımtatar halqına qarşı bir provokatsiyağa çevirildi. Fikrimce, bu provokatorlarnıñ areketleri daa yükselerde turğanlarnıñ avalesidir. Holop ve marginallar tenini sidirip qırımtatar halqını bölmege tırışalar. Amma bu ğayretler boşunadır. Çünki öz halqına qarşı çıqqan birisi iç bir vaqıt maqsadına yetemez. Provokatorlar yalan yolunda bulunğanlarını unutmasınlar.

Bu sene noyabrniñ 14-ünde ‘Milliy fırqa’ ve NDKT fırqalarından bir avuç provokatorlar olsa, noyabrniñ 21-inde olar öz taraflarına ‘Sebat’ cemaat teşkilâtını da celp etti. Ne qadar masharalıq! Provokatorlar cemiyet yüz çevirgen küçlerini birleştirdi. Noyabrniñ 22-sinde çıqqan ‘Veçerniy gorod’ gazetasında böyle yazıla: ‘Tünevin Aqmescitte ‘Qırımtatar cemaat teşkilâtlarınıñ birleşken frontu’nıñ mitingi olıp keçti. Miting milliy areket veteranlarınıñ Meclis liderlerine impiçment teşebbüsine qoltutmaq içün keçirildi’ ve ilh. Yani ‘Veçerniy gorod’ gazetasınıñ muarririyeti Milliy Meclis ve onıñ yolbaşçılığına bütün zeerini tökmege tırıştı. Böyle etip, şovinistler içün qırımtatar areket ‘veteranları’ tarafından teşkil etilgen bayram keçti.
Amma keliñiz er şeyni tertip nizamğa qoyayıq. Qırımtatar teatri yanında toplanğan bir avuç provokatorlar ve yalan qurbanları olğan 200 adam ‘Qırımtatar cemaat teşkilãtlarınıñ birleşken frontu’ sayıla bilirmi? Pek yüksek laf bu. Olarnıñ arasında sabıq ‘veteran’larnıñ sayısı 3-4 adam edi. Qalğan iştirakçiler – aldatılğan halq ve öz saiplerine çalışqan 15-20 provokator.
Öz nevbetinde böyle kibi aktsıyalarnen olar milliy öz -özüni idare etüv organlarınıñ saylav sistemasını bölmege tırışalar. Evelden azırlanılğan provokatsıya neticede qırım müsülmanlarıñ arasını bozmaq niyetleri bar edi.
Provokatorlar çeşit vastalarnen biñlernen insanlarnı toplamağa istediler, amma ğayretleri amelge keçirilmedi. Şunı qayd etmege ister edim ki, qırımtatar milliy areketiniñ tarihında böyle kibi vaqialar ilk sefer yüz bermekte.
Qurultay ve Milliy Meclis – bugünde bizim yekãne temsil organlarımız. Diskriminatsıya ve ksenofobiyadan öz –özümizni, halqımıznı qorçalamaq içün başqa yolumız yoq. Provokatsıyalarğa boysunmaq olmaz! Provokatorlar halq olarnıñ peşinden keter dep tüşüneler. Yoq, halqnı aldatıp olamazlar!
Sayğılı vatandaşlarımız, soñki saylavlarnı hatırlañız. Soñki saylavlarda olar kim olğanları añlaşıldı. Halq olardan kimseni Qırım Yuqarı Şurasına saylamadı. Olardan kimse yerli şuralarğa keçip olamadı. Halq olarğa işanmay.
Bu faal areketlerge ‘Qırım sedası’ gazetası da faal qoltuta. Men bu gazetke artıq yazılmam. Bunıñ sebepleri çoq, amma bu başqa mesele.
Öz vaqtında Milliy Meck,lis ve ‘Maarifçi’ assotsıatsıyası ‘Ana til oğrunda küreş’ programmasını tasdiqladılar. Mezkür programma bizni ana tilimiz oğrunda sarsılmayıp çalışmağa, ana tilinde laf etmege, onı teşviq etmege çağıra. Halq öz tuvğan tilini bilmek kerek ve bu işte oña gazeta ve dergiler yardım etmeli.
Milliyfirqacılar pek emin körüneler, amma olar asılında halq içün ne yaptılar. Tenqit etmek, davalaşmaq, şamata çıqarmaq er kesniñ elinden kele bilir, amma konkret işnen oğraşmaq, yolnu köstermek kibi vazifelerni milliyfirqacılar beceremezler.
Bizim milletimizge küçlü siyasiy bir firqa kerek, amma o firqa mıtlaq Milliy Meclisnen birlikte çalışıp biri-birini tamamlamaq kerekler.
Alâ daa bizde qırımtatarlarda milliy ideologiya işlenilmegen. Siyasiy saada iş pek çoq.
2011 senesi 10 dekabr künü Aqmescitniñ merkeziy bazarında insan aqlarınıñ Halqara kününe bağışlanğan açıq çoqbiñli miting ötkerildi. Mitingniñ esas talaplarından biri qırımtatar aqlarınıñ halqara - uquq vesiqalar, şu cümleden insan haqları umum Dekloratsıyası esasında tiklemesidir.
Milliy Meclis ve cemaat teşkilãtları tarafından keçirilgen bu miting, halq kimge qoltutqanını numayış etti. Mında Qırımtatar teatri yanında 21 noyabrde temaşa köstergen provokatorlarnıñ areketlerine printsipial qıymet kesildi. ‘Qırım sedası’ gazetasında 2011 s. 9 dekabr künü (50) pravokatorlarnıñ beyanatı basılğan edi. Şu beyannatta böyle ilân etile edi: ‘ Meydanğa çıqmaq davetlerge inanmañız. Bu açıq aydın provokatsıyalardır!’
Gazetlerden ise 2011 senesi 14 noyabr bu ‘marginal- veteranlar’ Milliy Meclisniñ vazifelerini, ‘ qırımtatar halqnıñ aqlarını qorumaq bütün aqlarını ‘ öz boynuna alğanlarını ögrendim. Efendiler, ya qırımtatar halqı sizni bütün aqlardan marum qaldıra bilecegini ve aqaret ve... içün mahkemege bere bilecegini tüşünmeysizmi?
Bütün qırımtatar aqlı adından çıqışta bulunmaq aqnı sizge kim bergen eken? Sizni halq saylağanını tasdiqlamağa siz kim aq berdi. Bizge ekiyüzlüler kerek degil.
Halq tarafından saylanğan Ukraina halq deputatı M.Cemilevni aqaretlemege aqqıñız yoq. Arañızda apishanelerde oturğanlar olsa, M.Cemilev tatilde raatlana edimi yoqsa? O ömrüniñ 16-17 yılını halq içün sarf etti. Bugünde bugün onı bütün dünya bile ve ürmet ete. Siz öz -özüñizni bütün alemge mashara etkeñizni alã daa añlamadıñızmı.
İnsan aqlarınıñ Halqara kününi bütün dünya qayd etti. Siz bu künde qayda ediñiz? Ne içün meydanğa kelmediñiz?
Miting ‘Millet, Vatan, Meclis!’ şiarı ve mitingte toplanğanlarnıñ alğışları altında keçti. Amma sizler aqqında, ‘ürmetli efendiler’ iç bir yahşı söz aytılmağan edi, çünki yüzüñizde artıq iç silinmegen qara leke bar.
Kerç şeerinden Dilãra Vaapovanıñ maqalesi halqımız Meclisnen qalacağını tasdiqlay. ‘Olarnı doğru yolğa qoymaqnı Allahqa yalvarır edim’ serlevalı maqaleñiz (‘Qırım’ ğazetası, 2011 s. 10 dekabr, № 82-83) içün sizge ayrıca teşekkürlerimni bildirem. Allah uzun ömür bersin.