Nariman Celâl «E» merkezinde ne aqqında soraştırılğanını añlattı

13.03.201714:35

Qırımtatar faali Nariman Celâl Ekstremizmge qarşılıq merkezinde keçirilgen sorğu aqqında tafsilâtlı malümatnı bildirdi.

Avdetniñ evel bildirgenine köre, bugün Nariman Celâl Ekstremizmge qarşılıq merkezine sorğuğa çağırıldı.

Nariman Celâl añlattı ki, o, «E» merkezine şahsiy şahıs oña nisbeten ariza bergeni içün çağırıldı. Şahıs bildire ki, Celâl «112» ukrain telekanalına bergen intervyularından birinde Qırımtatar Milliy Meclisi (Rusiyede 26.04.2016 mahkeme qararınen yasaq etilgen) reisiniñ muavini olaraq temsil etilgen. Ariza bergen kişiniñ fikrince, Nariman Celâlnıñ bunı intervyu devamında red etmegeni, onıñ Rusiyede yasaq etilgen birleşmeniñ azası olğanını bildire ve oña nisbeten RF cinaiy kodeksiniñ qaidelerini qullanmaq kerek.

«Şimdilik meni izaat bermem içün davet ettiler. Şimdiki statusımnı añlattım, bu intervyunı aqiqaten bergen edimmi, yoq, dep añlattım»,  –  dep ayttı qırımtatar faali.

Bundan da ğayrı, Celâl bildirdi ki, oña içtimaiy ağlarda ekstremistik timsallerni paylaşqanı içün (Memuriy qanun bozuvı aqqında kodeksiniñ 20.3-ci maddesi) 11 künge yaqalanğan Marlen Mustafayevniñ işi boyunca da izaat bermege rica ettiler.

«Menim, hatırlağanıma köre, Facebook içtimaiy ağında 5 biñ dostum bar olğanını, ve Marlen Mustafayevnen şahsen tanış olmağanımnı, onıñ nasıldır teşkilâtlar, birleşmeler, firqalarnıñ azası olğanını bilmegenimni, ve onı tek yaqalanuvnen bağlı olğanından bilgenimni añlatmaq mecbur oldım, ve onıñ ve diger balalarnıñ yaqalanuvı aqqında fikrimni halq ögünde bildirdim», – dep ayttı Celâl.

İçtimaiy ağlarda Facebook, Vkontakte, Odnoklassniki saifelerimizge, bunen beraber, Telegramda kanalımızğa qoşulıñız ve eñ aktual ve meraqlı malümatlardan haberdar oluñız.

Фото аватара

Автор: Редакция Avdet

Редакция AVDET