Qırım adliyecileri Kurbedinov ve Semedlâyev «E merkezine» çağırıldı

15.02.201716:25

Fevral 15-te adliyeciler Emil Kurbedinov ve Edem Semedlâyevge Qırımda Ekstremizmge qarşılıq boyunca merkezden celpnameler keldi.

Bu aqta Kurbedinov Facebook saifesinde bildirdi.

«Maña ve zenaatdaşıma nisbeten nasıl işni taqiq etmege qarar alğanlarını bilmeyim, amma aytayım ki, ofislerimizden alınğan içinde adliyeci sırları sayılğan malümat bulunğan bütün tehnika alâ daa mahsus hızmetlerde buluna», – dep yazdı adliyeci.

Emil Kurbedinov yaqalavdan azat etilgen soñ haber etti ki, Qırım musulmanlarını imaye etüv boyunca işini devam etmege niyetlene.

Avdetniñ evel bildirgenine köre, yanvar 26-da Qırım adliyecisi Emil Kurbedinov Rusiyede yasaq etilgen «Hizb ut-Tahrir» teşkilâtı tarafından teşkil etilgen mitingden 2013 senesi videonı paylaşqanı içün mahküm etilip, 10 künge apis etildi. Bundan evel Kurbedinovnıñ dairesi ve ofisinde tintüv keçirildi.

Amnesty International halqara uquq qoruyıcı teşkilâtı Emil Kurbedinovğa qol tutqanını kösterdi ve onıñ azat etilmesini talap etti. Bundan da ğayrı, rusiyeli adliyeciler oña destek köstergenini bildirgen açıq mektüp ile muracaat etti.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Фото аватара

Автор: Редакция Avdet

Редакция AVDET