«Taygan» arslan bağçasında aqay kişiniñ cesedi tapıldı

25.01.201710:15

«Taygan» arslan bağçası territoriyasındaki binalarnıñ birinde yanvar 15-te 29 yaşındaki aqay kişiniñ yaralanğan cesedi tapıldı.

Soñra belli oldı ki, Maksim Yakovlev o yerde qanunsız çalışqan edi, o, gecelernen Seyitlerden (Nijnegorskiy) ölgen ayvanlarnıñ etini alıp ketirgen edi, bunen beraber, onıñ aydayıcı şeadetnamesi yoq edi.

Qırım faali İlya Bolşedvorov aşıqıp ilân etti ki, ölgen yaş aqay kişini arslanlar yaraladı, onı hastahanege ketirmediler, ve yardımnı oña mal ekimi köstergen edi.

Park saibi Oleg Zubkov çetel devlette iş ziyaretinen buluna, bunıñ içün vaziyetke öz blogında izaat berdi. Hususan, o yazdı ki, Maksim Yakovlev bağçada göñülli olaraq çalışqan edi ve onı resmiy işke alacaq ediler. Bunen beraber, Zubkov añlattı ki, park hadimleriniñ sözlerine köre, yaş insan qan zeerlenüvinden vefat etti: bundan evel onı Qarasuvbazar (Belogorsk) rayonındaki köylerniñ birinde köpekler tişledi. Bunen beraber, onıñ sözlerine köre, Yakovlev Qarasuvbazar rayon hastahanesine yollanılğan edi, o yerde oña kerekli tibbiy yardım kösterildi ve tedaviylenüv içün yollanma berildi. Amma yigit tedaviylenüvden sanki vazgeçti ve öz-özüni tedaviylep başladı, ve ilâcnen beraber alkogol içkilerni içken edi.

«Bilem ki, «Taygan» bağçası reberiyeti Maksim Yakovlevniñ ölüminde iç te qabaatlı degil ve «Taygan» bağçası qaplanlarınıñ buña alâqası yoq», – dep ayttı arslan parkınıñ saibi.

Vaqianı Taqiqat komiteti ögrene.

«Taygan» arslan bağçası bir qaç sefer davalı vaziyetlerge tüşken edi. Bulardan biri aqqında Avdet haber etken edi: altı yaşındaki balanıñ anası mahkeme vastasınen ayvanat bağçası saibi Oleg Zubkovdan maneviy zarar içün 4 million ruble para cezasını aluvnı talap ete, çünki onıñ oğlunıñ ayağına «Taygan» arslan bağçasında taştan yapılğan eykel yıqıldı, neticede balanıñ kiçik parmağı kesip alındı.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Фото аватара

Автор: Редакция Avdet

Редакция AVDET