Ukrain arbiy adamları «Asker» temsilcilerinden afu soradı (VİDEO)

13.02.201716:37

57-ci brigadanıñ 34-ci batalyonı komandanı Dmitriy Krasilnikov Çonğar köyü civarında bulunğan batalyonnıñ bazasında yüz bergen vaqia içün halq ögünde afu soradı.

Afu sorav videosı Youtube kanalında yerleştirildi.

«Ümüt etem ki, kelecekte bereber hızmet etecekmiz. Bütün bozğanlarımıznı tüzetecekmiz, er şey yaparmız. Ve bir daa, tünevin gece yüz bergen vaqialar içün afu sorayım», − dep ayttı Krasilnikov, Qırımdan göñüllilerge muracaat etip.

Bütün Dünya Qırımtatar Kongressi reisiniñ muavini, Qırım vatandaş qamaçavı aktsiyasınıñ idarecisi Lenur İslâmov ise, qayd etti ki, dava bütünley çezildi.

Bundan evel dava yekünlengeni aqqında Qırımtatar Milliy Meclisiniñ (Rusiyede mahkeme tarafından 29.09.2016 s. yasaq etilgen) reisi, Ukraina halq deputatı Refat Çubarov bildirdi.

Avdetniñ haber etkenine köre, fevral 12-den 13-ke keçer gecesi Çonğarda «Asker» batalyonına ücüm etildi. Bundan soñ belli oldı ki, ücüm, USQ-niñ 34-ci batalyonı 57-ci brigadası tarafından etildi. «Pivden» operativ komandanlığınıñ yolbaşçı terkibi bu vaqianıñ «qanunsız silâlı teşkilâtnı silâsızlandıruv» olğanını ayttı.

Telegramda kanalımızğa qoşulıñız ve eñ aktual ve meraqlı malümatlardan haberdar oluñız

Фото аватара

Автор: Редакция Avdet

Редакция AVDET