Avrokomissiyanıñ temsilcileri: ‘Biz qırımtatarlarnıñ problemleri aqqında bilemiz ve qırımtatar cemiyeti Qırımda ve Ukrainadaki siyasiy esnaslarnıñ faal iştirakçisi olğanını bilemiz’

05.04.20000:00

2009 senesi oktâbrniñ 13-ünde Qırımtatar Milliy Meclis ofisinde Meclis reisiniñ birinci muavini Refat Çubar Şarq Avropa, Şarq Kavkaz ve Merkeziy Asiya boyunca Avropa Komissiyasi Departamentniñ müdiri Gunnar Veygand, Ukrainada Avrokomissiya temsilciliginiñ başı — Joze Manuel Pintu Teyşeru, Qırımda işbirlik teşebbüsi koordinatorı — sektornıñ yolbaşçısı Entso Damianini qabul etti. Ondan da ğayrı, körüşüvde Meclis azaları, kâtibiyetniñ reberi Zair Smedlâyev, tış bağlar bölüginiñ reberi Ali Hamzin, cemiyetler ve KHV ile bağlar boyunca idare reberi Şevket Qaybullayev da iştirak ettiler.
Körüşüv devamında Avropa Birligi ve Ukrainanıñ işbirligi kontekstinde ‘Şarq ortaqlıq’ programmasınıñ çerçivesinde Qırımnıñ inkişafı boyunca meseleler muzakere etildi.

Gunnar Veygandnıñ aytqanına köre, Avropa birligi içün Ukraina ve diger qomşu memleketlerinen işbirlik yapmaq meraqlıdır. Şu cümleden, ‘Şarq leyhasına’ ait memleketleri ile içtimaiy- iqtisadiy işbirlik halqlar ve insanlarnıñ aqları saasında işbirliginen beraberlikte olğanı pek müimdir.
‘Biz qırımtatarlarnıñ problemleri aqqında bilemiz ve qırımtatar cemiyeti Qırımda ve Ukrainadaki siyasiy esnaslarnıñ faal iştirakçisi olğanını bilemiz’ dep qayd etti Gunnar Veygand.
Şerefli musafirlerini qırımtatar problemlerine diqqatları içün minnetdarlıq bildirip, meclis azaları olarnı qırımtatar halqınıñ zemane al-vaziyetinen, acele surette çezilmesine muhtac esas aktual meselelerinen tanış ettiler. Böyle suallerniñ sırasına qırımtatar halqınıñ aq-uquqlarını tam şekilde tiklegen qanunları olmağanı, qırımtatar tilinde tasilniñ müşkül vaziyeti, yernen teminlev meselesinde qırımtatarlarnıñ diskrimantıyası kibi problemler kirdi.
‘Qırımtatarlarnıñ haqlarını tiklenmesi ile bağlı añılğan meselelerinden er biri konfliktsiz çezilmesi mümkün ve kerektir’.- dedi Refat Çubarov. Joze Manuel Pintu Teyşeru ise qırımtatarlarnıñ qaytuv ve abadanlaştıruv boyunca meselelerniñ al etilmesiniñ qanuniy seviyedeki vastalarnıñ bulunmaması sürgünlik aqibetlerini yoq etüv esnasına keder etkeninen razı oldı.
Gunnar Veygand, ayrıca postsovet devirde yaşağan ve vatanına qaytmağa arz etken qırımtatarlarnıñ sayısına dair statistik bilgiler ile meraqlandı.
Körüşüvniñ neticelerini çıqaraq, Refat Çubarov, Avropa Birliginiñ Qırımnıñ içtimaiy-iqtisadiy inkişafına doğrulğan çeşit leyhalarnı amelge keçirmek niyetine qoltutıp, Qırımda amelge keçirilgen er bir leyhanıñ güzel neticesi tek qırımtatar problemleri ve meraqlarınen tar bağı ile mümkündir, dep qayd etti.
Öz tarafından ise, AB-niñ vekilleri Qırımnıñ bütün problemleri aqqında tolu ve tam bilgiler almasınıñ müimligini ve qırımtatar siyasetçileri ve Avropa Parlametiniñ azaları arasında tar bağlar qurulmasınıñ emiyetini añlattılar.

 

Qırımtatar Milliy Meclisi matbuat hızmeti

 

Опубликовано Рубрики Без рубрики