Yoluñız açıq olsun!

11.05.20000:00

Qırımtatar Milliy Meclisiniñ ofisinde, Meclisniñ tasil bölüginiñ reberi, ‘Maarifçı’ qırımtatar tasil hadimleri Assotsiyatsiyasınıñ reisi Safure Kacametova noyabrniñ 13-ünde Türkiye Cumhuriyeti ve Şimaliy Qıbrızğa oquvğa ketken studentler ve olarnıñ ana-babaları ile körüşti. Milliy Meclis reisi Mustafa Cemil soñki sefer Şimaliy Qıbrız Türk Cumhuriyetini ziyaret etken vaqtında, Yaqın Şarq Tehnik Universitetine teşrif buyurğan edi. Bu körüşüv devamında univeritetniñ rektorı Suat Günsel ve Mustafa Cemil Qırımtatar Milliy Meclisi ve Yaqın Şarq Universiteti arasında işbirlik aqqında protokolnı imzalağan ediler. Protokol boyunca Yaqın Şarq Universiteti ‘İqtisadiyat ve idare’ fakultetine er yıl Qırımdan eñ azdan 3 talebeni ingliz tilinde bedava oquvğa qabul etmeleri kerek.
Bu yıl ziyaret oquv yılnıñ arfesinde keçkeni sebebinden ‘Maarifçi’ assotsiatsiyası tarafından mezkür universitette oqumağa istegen eki talebe tayin etildi. Bular Halqara munasebetler fakultetiniñ magistraturasına kirgen Dinara Mamutova ve ‘Turizm ve musafirhane hocalığı’ bölügine kirgen Leniye Galiçenko oldılar. İlk yılnıñ devamında talebeler ingliz tilini ögrenecekler, yılnıñ soñunda ise imtianlarnı tapşırıp, saylağan fakultetlerinde oqumağa imkân bergen sertifikatlarnı elge alacaqlar. Nevbetteki yılları studentler ‘Maarifçi’ tarafından Türkiyege talebelerni oquvğa yollaması boyunca ‘TCS’ programmasınıñ işi çerçivesinde keçirilgen imtianları esasında saylanılacaqlar. İstegenlerniñ muracaatları martnıñ 10-undan başlap, ‘Maarifçi’ ofisinde qabul olunacaq, testler ise aprel ayında keçirilecek.

 

 

Опубликовано Рубрики Без рубрики