Yalta ve Haçmaz — qardaş şeerleridir.

20.05.20000:00

2009 senesi oktâbrniñ 31-inden noyabrniñ 3-üne qadar Yalta şeer başlığı delegatsiyası, şu cümleden Yalta şeer başı Sergey Brayko, köçüv ve milletlerara munasebetler idaresiniñ başı, Meclis azası Zaur Smirnov ve Yalta şeer şurasınıñ deputatı Dairuş Taranpey Azerbaycanğa iş boyunca teşrif buyurdılar.
Noyabrniñ 1-inde Yalta şeer delegatsiyası Haçmaz şeerini ziyaret etti. Anda da tantanalı müitte Yalta ve Haçmaz şeerleri arasında qardaşlıq munasebetleri aqqında muqavele qabul olundı. Mezkür muqavelede qardaş şeerler arasında işbirliginiñ keniş dairesi közde tutula. Bularnıñ sırasında medeniy almaşma, içtimaiy-iqtisadiy ve iş bağlarınıñ kenişletilmesi kibi meselelerinen birlikte turizmniñ inkişafına ayrı diqqat ayırılğan.

Yalta delegatsiyasını Azerbaycanda memleketniñ prezidenti İlham Aliyev qarşıladı. İlham Aliyev Azerbaycan ve Ukraina arasında zemaneviy munasebetlerine yüksek qıymet kesip, imzalanğan muqavele eki devlet arasındaki bağlarnıñ qaviyleşkenini tasdıqlay dep qayd etti. Bundan da ğayrı, Azerbaycan prezidenti memleketteki ileri regionlardan birisiniñ paytahtı olğan Haçmaz şeeri içün bütün dünyağa meşur olğan Yalta şeerinen qardaş olmaq büyük şüret olğanını bildirdi.
Yalta şeer başı Sergey Brayko ise, öz nevbetinde, minnetdarlıq sözlerinden soñ, eki şeerniñ qardaşlığı Azerbaycan ve Ukraina arasındaki munasebetler regional seviyesinde kenişleycegine şübesizligini bildirdi.
Meclis azası Zaur Smirnov ise, qırımtatar halqınıñ temsili olaraq, Bütündünya Qırımtatar Kongressiniñ prezidenti Refat Çubarovdan mektüpni naqil etip, Azerbaycan halqına 90-seneleri köstergen yardımları ve qırımtatar talebelerini öz oquv yutlarına qabul etkenleri içün minnetdarlıqlarını ve sayğılarını bildirdi.

 

Milliy Meclisniñ matbuat hızmeti

 

Опубликовано Рубрики Без рубрики