Qırımtatar milliy Küreşiniñ yañıdan tiklenilmesiniñ qısqa hronikası

18.10.20000:00

Qırımtatar medeniyetiniñ temel qısımlarından biri sayılğan, Qırımda eskiden meşür olğan ananeviy sport çeşiti Milliy Küreşiniñ sistemli şekilde canlandıruvı  qırımtatarlar arasında Vatanğa avdetniñ ilk künlerinden başlap muzakere etile edi.

Bu ğayeniñ faal tarafdarları- meşür sportsmenler, ziyalarımız-ocalar, nerbiyeciler, cemaat erbapları ve siyatçiler oldılar.

Qırımtatar Meclisi tarafından teşebbüs kösterilgen Milliy Küreşniñ canlandıruv ğayesini amelge keçirmek boyunca ilk adımları qırımtatarlar arasında keniş destek ile qarşılaştı.

2008 senesi 22 noyabr künü- Milliy meclis reisi Mustafa Cemilev professional sportçı-küreşçiler ile körüşti. Mezkür körüşüv ketişatında  Milliy Küreş Qırım Federatsıyasınıñ azırlanılması ve keçirilmesi içün Teşkiliy Komitet tasdiqlanılğan edi.

2008 senesi 28 noyabr künü- Teşkiliy Komitet tarafından QMPÜ rektorı, bir sıra qırımtatar cemaat teşkilãtları ile birlikte, Qırımtatar Milliy Meclis iştiragınen  qırımtatar milliy Küreşiniñ tarihı ve inkişafına bağışlanılğan ilmiy-ameliy konferentsiya keçirildi.

2008 senesi 19 dekabr künü- QMPÜ-inde Milliy Küreş Qırım Federatsıyasınıñ tesis konferentsiyası keçirildi. Konferentsıya qırımtatar milliy gimnnen, Qırım Müftisi hacı Emirali efendiniñ hayır duasınen ve qırımtatar Meclis azaları, QMC nazirler şurasınıñ vekilleri, QMPÜ rektorı F.Yakubov ve belli sportçılarnıñ alğış sözleri ile başlandı. Milliy Küreş Qırım Federatsıyasınıñ prezidenti olaraq olimpiya çempionı, ekidefa dünya çempionı Rustem Kazakov, birinci vitse -prezident vazifesine- Cafer Bekirov ve vitse-prezident olaraq Seydamet Yağyayev saylanıldı.

2009 senesi 1 dekabr künü- QMCnde Ukraina Adliye Nazirliginiñ Baş adliye idaresi tarafından Milliy Küreş Qırım Federatsıyasınıñ Nizamnamesi resmiyleştirildi ve № 826 ile munasip şeadetnamesi teslim etildi.

 

2010 senesi 23 yanvar künü- QMPÜnde, 2009 senesi boyunca neticelerini çıqarmaq ve ilerideki faaliyetini müzakere etmek içün Milliy Küreş Qırım Federatsıyasınıñ konferentsıyası keçirildi.mezkür konferentsiyada tam olaraq Federatsıyanıñ  idare organları tasdiqlanıldı.

Daa 2008 senesi saylanılğan federatsıya prezidenti Rustem Kazakov, birinci vitse -prezident vazifesine- Cafer Bekirov ve vitse-prezident olaraq Seydamet Yağyayevge qoşma olaraq, vitse- prezidentler vazifesine Aziz Abdullayev, Muhterem Muhteremov, Ali Hamzin ve Usein Çapuh  saylanıldı.

Milliy Küreş Qırım Federatsıyasınıñ fahriy Prezidenti olaraq konferentsıyanıñ iştirakçileri Bütündünya qırımtatar kongressiniñ Prezidenti Refat Çubarovnı sayladılar.

2009 senesiQırımnıñ çeşit regionları boyunca 18 sport merasimi, şu cümleden: 4 halqara, 8 bütünqırım turnirleri keçirildi. Milliy Küreş canlanmasını kütleviy bayram merasimlerinde küreş yarışlarnıñ keçirüv adetiniñ pekitilmesi de tasdiqlay. Federatsıya tarafından yerli ve regional meclisler ile birlikte, bir sıra rayon devlet memüriyetler, şeer başlıqları ve sponsorlarnıñ destegi ile keçirilgen yarışalrında 1000 yaqın sportçılar, şü cümleden Türkiye ve Romanyadan kelgenler iştirak ettiler.

Milliy Küreş Qırım Federatsıyası Aqmescitte 2009 senesi 19-22 mayıs künleri olıp keçken Bütündünya qırımtatar kongressiniñ azırlanılması ve keçirilmesinde faal iştirak ettiler. BQK iş künleri teşkil olunğan ve 12 memleketinden kelgen qırımtatar sportsmenlerni birleştirgen mahsus sektsıyanıñ işleri federatsıyanıñ ilerideki faaliyetiniñ temelini teşkil ettiler.

2009 senesi 9 okãbrde Aluştada keçirilgen  Kuraş küreşi boyunca VII Halqara Çempionatı Qırımnıñ sport yaşayışında emiyetli vaqialardan biri sayılır. Mezkür çempionatta Milliy Küreş Qırım Federatsıyasınıñ küreşçileri yüksek neticelerni numayış ettiler, İlimdar Saidov ise tunç dünya çempionı namını qazandı.

 Yoluñız açıq olsun, Milliy Küreş Qırım Federatsıyası

 

Опубликовано Рубрики Без рубрики