Fevzi Rizayev – Dubay bortprovodnigi

15.10.20010:00

Siz qavurılğan sarınçqa, pişken çıq-çıq balaban iç aşadıñızmı? Artınızdan aç, fuqare aziyalılar sürüsi iç quvalamadımı? Siz de dünyanıñ episi memleketleri ayağınız altında, kok ise – yerini deñiştirmek içün bir fezadır dep tüşünesizmi? Yoq? Bugünki rubrikamıznıñ qaramanı bunı özünde sınadı. Demek, yaqınca tanışayıq – doğma Qırım köyünden bortprovodnik Fevzi Rizayev.

26 yaşındaki Fevzi Büyük-Süren (Tankovoye) köyündeki istidatlı balalar içün litseyiniñ mezunıdır. Tuvğan köyü Qurman rayonınıñ Ağyar-Ciren (Kotelnikovo) köyüdir. ‘Kokte işni’ iç beklemeden elde etti. Kiyevdeki milliy lingvistik üniversitetini bitirgen soñ, paytahtta iş qıdıra edi, lâkin işni…. Dubaide ‘Emireyts’ aviakompaniyasında taptı.

Fevzi ziyaret etken memleket ve şeerlerni artıq saymay, buzdolaptaki magnitlerni toplamay, ve seyahatlarnı er künki bir iş olaraq qabul ete.

‘Bazan yerge tüşip normal bir cedvel boyunca iş tapıp çalışmaq vaqtı keldi dep zan etem. Lâkin areketçenlikten vazgeçmek, bütün dünya sıñırsız olğanından vazgeçmek qolay olmaycağını añlayım. Añında episi dünya ülkeleri sanki uzatılğan qol mesafesinde bulunğanı duyğusı pekine, Braziliyağa barıp yetmek köyümden Aqmescitke qadar yetmek kibi körüne. Böyle vaqıtlarda, elbette, özüni büyük bir alemniñ qısmı dep zan etesiñ’, — emin Fevzi.

Qavurulğan sarınçqanı aşamağa qorqmañız

Oquyıcılarımızğa Fevzi bey putövkalar boyunca seyahat etmemek tevsiye ete, çünki ‘olar passiv seyahatçılar içün yaratılğanlar em de ülke aqqında üstün bilgiler bermekteler’. Yolculıqnı mustaqil planlaştırmağa tevsiye ete: hatıra yerler ve abideler boyunca küçük tetqıqat keçiriñiz, episi künlerge plan tiziñiz, areketçen olmaq ve er bir yerde bulunmağa tırışıñız. ‘Ve eñ esası yerli aşlarnı aşap baqmağa qorqmañız. Bu medeniyetniñ bir qısmıdır, onı mıtlaq sınamalı. Ne aşasañız aşañız, Bangkokta qavurulğan sarınçqa olsun, ya da Parijde pisken çıq-çıq balaban olsun, bu tecribe aqlında çoqqa qalır!’ – dep aveslendire Fevzi.

Dakkideki şok


Külünçli allar da ola. Fevzi bey Bangladeşniñ paytahtında Dakkide olıp keçken şaşırtıcı seyahatnı hatırladı. Şeerge kelgeninen, bir qaç zenaatdaşınen şeer bazarlarından birine barmaq qararına kelgenlerini hatırladı. Lâkin otelden çıqqanınen taksi qıdırğanda, seyahatçılar yolda rastkelgen yerli sakinlerniñ diqqatını celp etkenlerini añladılar. Bir qaç daqqiqa içinde artlarından bir sürü bala tizilgen, olar para ve aş soray ediler. Tezden yerli marketni ziyaret etmek yañlış bir fikir olğanı belli oldı. ‘Muthiş trafik ve konditsionerniñ olmaması sebebinden bir şey yapmaqtan vazgeçe ediñ. Amma eñ ziyade arabanıñ penceresinden seyir etkenimiz manzara sebebinden: bir metr mesafesinde biñlerce adamlar, er yerde çöplük ve çamur, yol kenarında oturğan, ellerinde ufaq balalar ile evsiz-barqsız qadınlar. Bu da yetmegen kibi, taksimiz bozuldı, ve çoq adamlı bir yerde diger taksi qıdırmaq mecbur oldıq. Kene de, aynı şey tekrarlandı, bir qaç daqqa içinde etrafımızda onlarca meraqlı şeer sakinleri toplandı’, — dep hatırlay genç bortprovodnik. Sonra adamlar alqasını polis bozdı, olarnıñ diqqatını toplanğan adamlar celp etken. Yaşlarnıñ ellerini sıqıp, polisler bu insanlar avropalılarnı tek televizorda seyir etkenleri aqqında haber etti. ‘O vaqıt özümizni sanki meşur olaraq zan ettik, lâkin keri qaytmaq içün kene taksi qıdırmaq qararına keldik’, — dey Fevzi.

Avropalılar em çalışmağa, em de raatlanmağa bileler


Diger medeniyetler ile tanışuv tecribesi aqqında söz yürütkende Fevzi dey ki, yalıñız seyahatqa çıqıp insanlar ile munasebette bulunıp çeşit ülkelerde adamlar ne qadar farqlı olğanlarını añlaysıñ.

‘Lâkin dünyanıñ belli bir qısmında bir çoq ülkelerde sakinleriniñ mentaliteti ve yaşayış tarzında umumiy beñzerlikler tapasın’,

teesuratlarınen paylaşa Fevzi.
Eñ ziyade genç avropalılarnıñ yaşayış tarzından tesirlendi, olarnıñ iş ve raatlıq zamanını tertip etkenlerinden ayrette qaldı.

‘Avropada yaşağan insanlar işke de, boş vaqtına da kerekli derecede vaqıt ayırğanları şaşırta. Aqşamğa yaqın, adamlar işten qaytqan vaqıtta, şeerlerniñ soqaqları piyadelerge tola, olar oturğıçları soqaqlarda turğan qavehanelerge kireler, gazonlarda yatmaq ya da çapmaq içün parqqa keteler’, — dedi F. Rizayev.

Uriye ABLA subetleşti.

Опубликовано Рубрики Без рубрики