Июннинъ 7-де «Фиданчыкъ» балалар инкишаф ве окъутув меркезинде «Козьайдын» информацион-меркезининъ ве кучюклер ичюн Илимлер академиясынынъ «МАНюня» тогерегининъ рехбери Зарема Хайрединова, онынъ талебелери Амаль, Ибраим Абдураманов, Велиде Мамутова ве «Янъы дюнья» газетасынынъ муаррири Зера Бекирова талебелернен корюшти.
Корюшювде «Фиданчыкъ»нынъ талебелери йыл девамында «Шенъ элифбеден» огренген шиирлерини ифадели окъудылар ве бу мультимедиа окъутув программанынъ муэллифи Зарема Хайрединовагъа озь тешеккюрлерини бильдирдилер.
Зера Бекирова «Янъы дюнья» газетасына иляве оларакъ яйынлангъан «Балалар дюньясы» газетасыны балаларгъа бир кере даа такъдим этип, онынъ саифелеринде балаларнынъ яшайышындан меракълы левхалар нешир этильгенини ве йыл девамында «Фиданчыкъ»та олып кечкен меракълы тедбирлер акъкъында язылгъаныны къайд этти.
«Фиданчыкъ»та кучюклер ичюн Илимлер академиясынынъ «МАНюня» тогерегине къатнагъан Ибраим Абдурамановнынъ «Байракъ» мульфильми ве Велиде Мамутованынъ «Балалар яшасын» мульфилимнинъ премьерасы олуп кечти. Ичтимаий агъларда бу мульфилимлерни корьген Зафер Къаратай бойле эйджанлы сатырлар язды: «Байракъ –къыскъа фильм. Таракъ тамгъалы кок байрагъымызнынъ икяеси. Фильмнинъ муэллифи Ибраим Абдураманов – садедже 10 яшында, онынъ татлы къардашы Мерьем 3 яшында олуп, фильмни сеслендирген. Ильмий рехберлери Зарема Хайрединова – сессиз, сакин, амма инанылмаз ишлер япкъан федакяр бир ватансевер. Бу пек яхшы документаль фильмни япкъан меслекдашларыма хош кельдинъиз деп айтам. Аллах ёлунъызны ачыкъ этсин!». Зафер бейнинъ мульфилимлерге кескен юксек къыйметине къошулмамакъ мумкюн дегиль.
Шуны къайд этмелимиз ки, бу корюш мастер-класс шекилинде кечирильди. Зарема оджа ве талебелери ««Фиданчыкъ»нынъ балаларынен берабер Нузет Умеровнынъ «Достум» ширине мульфилим яптылар. Бу фаалиет талебелерге эм ана тилимизни эм де информацион технологияларыны огренмеге имкян бере. Умют этемез ки, кучюклер ичюн Илимлер академиясында «МАНюня» тогерегинде къырымтатар тилинде де группа ачылыр ве даа чокъ файдалы окъутув фильмлер дюнья юзюни корер.
Сагъ олунъыз оджалар, сагъ олунъыз балалар!!!!
Энисе Абибуллаева
