Aqmescit civarındaki köyde Sovetler Birligi qaramanınıñ hatırasını ebediyleştirdiler

15.03.20160:00

Aqmescit rayonınıñ Cağa Mamış köyünde Sabıq Sovetler Birliginiñ qaramanı Üzeir Abduramanovnıñ mezarında abide qoyuldı.

Köydeşniñ mezarında baştaşnı qoymaq teşebbüsi yerli meclis vekilleri Erfan Reşitov, Üsein Reşitov, Dilâra Abduraimova ve Levaner Dadoyğa aittir. Regional meclisniñ qoltutuvı ile 2015 senesiniñ martında iş başlandı.
Abideniñ tantanalı açılışı aprelniñ 13-nde köyniñ alman basqıcılarından azat etilüv kününde oldı. Tedbirde qaramannıñ soy-sopları, hususan oğlu Şevket Abduramanov, köy sakinleri ve davet etilgen akimiyet vekilleri iştirak etti.

Avdet- ke abide aqqında tarif eter eken, yerli meclis reisi Erfan Reşitov baş taş köy cemaatınıñ paralarına qoyulğanını ayttı. «Başqa iç bir yerden para kelmedi»,- dep qayd etti o.
Cağa Mamış köyüniñ yerli meclisi aktsıyada iştirak etkenlerge ve qoltutqanlarğa büyük minnetdarlığını bildire.
Malümat. Sovetler Birliginiñ qaramanı ÜZEİR ABDURAMANOV ABDURAMANOVİÇ martnıñ 25-nde 1916 senesi Qırım ASSR Aqmescit rayonınıñ Cağa Mamış köyünde dünyağa keldi. 1933 senesi o fabrika işçileri mektebini bitirdi. 1939 senesinden başlap Qızıl Orduda aşçı olıp çalıştı.

Cebege 1941 senesi 321 ayrı müendis batalyonınıñ komandiri olaraq çıqtı (65-nci ordu, Merkeziy cebe).

1943 senesiniñ sentâbrinde starşina Abduramanov duşmannıñ bitmegen ücümi astında Desna ve Soj özenlerinde köpürni qurğan insanlardan oldı.Böylece, sovet ordularınıñ bir yalıdan diger yalığa keçmesi bayağı tezleştirildi. Sovetler Birligi qaramanı unvanını 15.01.1944 senesi aldı (№3368).

Cenkten soñ demobilzatsiyadan keçti. Özbek SSR Navoi şeerinde yaşadı. Lenin ordenı, Vetan cenkiniñ birinci derece ordeni ve diger medallerni aldı.