1 mayıs künü Bahçisarayda İsmail Gasprinskiyniñ ev-muzeyinde Qırım hanlığınıñ Transilvaniya, Valahiya (zemaneviy Romaniya) ve Moldaviya (zemaneviy Moldova) kinazlıqları ile tarihiy bağlarına bağışlanğan ilmiy konferentsiya keçirildi.
Tedbirde Romaniyanıñ qırımtatar diasporasınıñ vekilleri – Bukreş, Konstantsa, Tulçe, Mecidiye ve başqa şeerlerden professorlar, tarih ilimleri doktorları; d-r Veniamin Çobanu, Romaniya Akademiyası, “A.D.Xenopol” Tarih İnstitutınıñ baş ilmiy tedqiqatçısı; professor Virgil Çokıltan — Romaniya Akademiyası, Nikolay İorg adına Tarih İnstitutınıñ baş ilmiy tedqiqatçısı; professor Kelın Felezeu – Psihologiya ve Pedagogika ilimleri fakultetiniñ dekanı; Tasin Cemil – professor, Türk ve Orta Asiya tedqiqatlar institutınıñ müdiri, Babeş-Boyai Universiteti, Azerbaycan ve Turkmenistan Cumhuriyetlerinde Romaniyanıñ sabıq elçisi; Eyügen Nikolye – professor, Romaniya İA Milly argheologik muzeyiniñ müdir muavini; Vasile Simileanu – publitsist, “GEOPOLİTİKA” mecmuasınıñ müdiri.
“Romaniya türk-tatar müsülmanlarınıñ demokratik birligi”niñ Prezidenti Samir Minannıñ yolbaşçılığında Romaniyadan alimler delegatsiyası Qırımğa 2011 senesi 30 aprelde kelip çıqtı.
Konferntsiya çerçivesinde delegatlar numizmatika aqqında maruzalarnı taqdim ettiler, hususan Vaalhiya ve Moldaviya territoriyasında tapılğan qırımtatar devletçiligi devri kapikler (XV-XVIII as.) aqqında, Qırım hanlığı ve Tuna kinazlıqlarınıñ tarihiy aspektleri aqqında.
MALÜMAT: “Tuna ya da Romaniya tatarlar”nıñ çoqusı – XIX asırda Rusiye imperatorlığı tarafından zapt etilgen Qırım ve Şimal Qara deñiz yalısınıñ territoriyasından bu yerge köçken qırımtatarlarnıñ nesilleri. Diger qısmı – bucak tatarları (noğaylar). Olar Romaniyanıñ şarq qısmında Dobruca tarihiy vilâyetinde yaşaylar.