Эльвида, сафдашымыз Ибраим бей…

11.05.20160:19

11-августта Москвадан кедерли хабер кельди – анда бир къач афтадан берли хавфлы амелияттан сонъ тедавийлев – реабилитацияда булунгъан белли джемаатчымыз ве сабыкъ девлет мемуры Ибраим Энвер огълу Мамутов 51 яшында вефат этти.

Ибраим бей 1963 сенеси 28-июльде Андижанда, Багъчасарай районындан мында сюргюнликке огърагъан къорантада догъды. Онынъ мектеп ве институтаки окъув ве ильк фаалиет йыллары Самаркъандда кечти. Икътисадиятчы зенааты боюнджа алий тасилли мутехассыс олды. Халкъымызнынъ Ватангъа кутьлевий авдети башлангъанда, о да Къырымгъа кочюп, ширкет тесис эте ве мувафакъиетли чалыша.

Миллий ишлерден четте турмагъан, къырымджылыкъ муити укюм сюрген къорантада буюген Ибраим бей Ватанына къайткъан сонъ даима къурумларымыз этрафында булунды, оларнынъ къарарларыны беджерип кельди. Озю де дёртюнджи ве бешинджи Миллий Къурултайларнынъ делегаты сайланды, оларнынъ чалышмаларына озь дегерли иссесини къошты.

Салмакълы икътисадий, тешкилий, идареджилик теджрибе саиби олгъан И. Мамутов Миллий Меджлис тевсиесинен девлет ишине кече. О, бир къач йыл санайы, накълие ве алякъа везирининъ, сонъра девамлы вакъыт Украина президенти Къырымда даимий Темсильджисининъ муавини вазифелеринде чалышты.

Ибраим бей насыл девлет муэссиседе чалышмасын, озь миллет менсюплигини унутмады, гизлемеди, аксине – гъурур иле косьтерип турды. Онъа мураджаат эткен инсанларгъа къолундан кельген ярдымда булунмагъа тырышты. 2007 сенеси къырым неширлеринден бирисининъ дигер суаллери сырасында, «Сформулируйте основные тезисы крымскотатарской национальной идеи», буюргъан теклифини изаатларакъ:

«Думаю, что крымскотатарский народ всегда будет стремиться к созданию национальной автономии в составе независимого демократического государства Украина. Должны быть четко сформулированы принципы и методы реализации данной цели. Первое – это законность действий, второе – ненасилие, причем крымские татары имеют богатые демократические традиции в защиту своих прав, третье – образование, и четвертое – информирование представителей других народов, живущих с нами вместе, почему мы тем или иным образом так поступаем», деди.

Сафдашымыз Ибраим бей даима хатырамызда акъикъий ватанпервер, миллетсевер, самимий ве кулерюзьлю инсан, беджерикли, мувафакъиетли ве дегерли шахыс, фааль, исрарлы, бильгили ве миллий гъаеге садыкъ джемаатчы оларакъ къаладжакътыр.

VI Миллий Къурултай делегатлары, Миллий Меджлис, Тефтиш Комиссия, Меркезий сайлав Комиссиянынъ азалары Ибраим Энвер огълу Мамутов вефат эткени мунасебетинен онынъ анасына, омюр аркъадашына, учь эвлядына, татасы ве агъаларына эм де дигер якъынларына терен тазие бильдирелер, сабыр ве баш сагълыгъы тилейлер.

Алла рахмет эйлесин.