Bahçisaray cemiyeti Romaniyanıñ belli qırımtatar cemaat erbabı Saladin Aciaqaynıñ hatırasını añdı

11.05.20160:19

12 yanvar künü Bahçisaray şeeriniñ 6-cı mikrorayonında Han-Çair camisinde 64 yaşında ömrü üzülgen qırımtatar halqınıñ ulu vatanperveri, Romaniyanıñ müsülman qırımtatar demokratik cemiyetiniñ sabıq yolbaşçısı Saladin Aciaqay ruhuna Quran-i-hatim keçirildi.

Vatandaşımıznıñ hatırasını añmaq içün milliy areketniñ veteranları, Milliy Meclis, yerli meclis azaları, Bahçisaray şeeriniñ Qırımtatar qadınlar birliginiñ azaları, cemaatçılıq toplandılar. Olar da bu merasimni teşkil ettiler.

“Saladin Aciaqay Romaniyadaki qırımtatarlarına Vatan, til, tarih, medeniyetlerini unutmağa bermegen qırımtatarlardan biridir. Halqımıznen bağlı episi tedbirlerde işitrak etmege tırışa edi. Endi bir aydan ziyade aramızda yoq. Bunı duyamız. Öz halqı içün can bermege azır olğan bu insan daima hatıramızda”, — dey Bahçisaray şeeriniñ Qırımtatar qadınlar birliginiñ yolbaşçısı Zodiye Saliyeva.

Hatırlatayıq ki, icrette belli qırımtatar cemaat erbabı, Romaniyanıñ Müsülman ve tatarlarnıñ demokratik birliginiñ fahriy prezidenti Saladin Aciaqay 1946 senesi 25 fevral künü Kobadin rayonınıñ Kertikpinap köyünde doğdı. Ayatı devamında öz halqına pek çoq diqqat ayıra edi. Qırımtatar halqınen bağlı çoq tedbirlerde iştirak ete edi, ve çoqusını özü de teşkil ete edi. Çoqusı türk-tatar merasimlerniñ sponsorı edi, hususan Kostencede er yıl keçirilgen türk-tatar festivalniñ keçirilüvine yardım ete edi.

 

Ondan da ğayrı, S.Aciaqay Bütündünya qırımtatar kongressiniñ teşkil etilmesinde faal iştirak etken edi. Bütündünya kongressiniñ koordinatsion keñeşiniñ azası, Romaniyanıñ Müsülman ve tatarlarnıñ demokratik birligi yolbaşçısı Amet Varolnıñ yardımcısı edi.

S.Aciaqay keçken seneniñ 3 dekabr künü vefat etti.

Elmara MUSTAFAYEVA