Zair Smedlãyev: Başlanılğan mahkeme işi siyasiy sımarıştır.

11.05.20160:19

15 dekabr künü Aqmescit Demiryol rayon mahkemesi qırımtatar Meclisi kãtiplikniñ reisi Zair Smedlãyevni cemaat nizamını bozmasında iştiragı, huquqqoruyıcı organlarınıñ hadimlerine qarşılıq köstermesinde qabaatladı.

Mahkeme 4 yıl evel yüz bergen vaqianı, yani 2006 senesi 22 iyünde Qırım Apellãsıon mahkemesi binasınıñ yanında olıp keçken adiseni hatırladı. O vaqıtta Kurtseit Abdullayev, Lenur Malayev, Fahri Seythalilov, Simar Hayretdinov, Elviz Kurtametovnıñ ‘Kotton barı boyunca iş’ dep adlandırılğan mahkeme iş baqıla edi.

 

Zair Smedlãyev ise oña çıqarılğan bu qabaatlavlarnen razı olmayıp, 2006 senesi 22 iyünde huquqqoruyıcı organlar tarafından mahkeme işinde apske alınğanlarnıñ yaqın ve tuvğanları, kütleviy haber vastaları ve cemaat vekilleriniñ iştiragını yasaq etmeleri boyunca haqsız qarar alınğanını añlattı. Zair Smedlãyev, yerli şura deputatı olaraq, Ukraina halq deputatınıñ avalesi ile cemiyette pek eyecanlı qarşılanğan mahkeme işinde iştirak etmek kerek edi. Bundan da ğayrı, oña qarşı başlanılğan bu mahkeme işi, qırımtatar milliy areket iştirakçilerini qorquzmaq maqsadını taşığan sımarış olğanını bildirip, yüksek memurlardan biriniñ ‘ Meclis azalarınıñ bir qaç danesini alsañ, qalğanları özleri qaşıp keter’ degen sözlerini hatırlattı. Ne içün onı saylağanlarını Zair Smedlãyev şunen añlata ki, çoq yıllar devamında o, sade insanlarğa topraq ayıruv meselesinde aqılğa sığmağan haqsızlıq, müsülman mezarlıqlarında yüz bergen vandalizm areketleri ve bunıñ teşkilãtçıları alã cezalandırılmağanına, Balaklavskaya ve Ay-Petride qırımtatarlarnı urup yıqqanlarnıñ yolbaşçılarına qarşı çıqqan edi.

Mahkemeniñ qararına baqmadan, Zair Smedlãyev küreşini qaldırmaycağını ve zaten qaramaniy halqımıznıñ milliy-azatlıq küreşi bitmeycegini bildirdi.