17 dekabrde Qırım Muhrat Cumhuriyeti Yuqarı Şurasınıñ Milletlerara munasebetler ve sürgün etilgen vatandaşlarnıñ meseleleri boyunca daimiy komissiyasınıñ oturışı olıp keçti. Komissiyanıñ baqqan esas suali – Qırım Nazirler Şurasın alğışlağan 2010-2011 senelerine Qırımnıñ iqtisadiy ve içtimaiy inkişafınıñ strategiyasıdır.
Strategiyanıñ esas yonelişleri aqqında bulunğanlarğa Qırımnıñ İqtisadiyat Naziri Svetlana Verba tarif etti. Onıñ sözlerine köre, leyha bir qaç adımnen şekillendi. Birinci adım ile soñki on yıl içinde Qırımnıñ iqtisadiy, ekologik ve içtimaiy inkişafınıñ talili yapıldı. Ekinci adım ile maqsadlar qoyuldı ve muhtariyet inkişafınıñ prioritetlerine köre onıñ ömürge keçirilmesiniñ aletleri işletildi. Üçünci adımğa köre farqlı idareler ve hızmetler tarafından vesiqanıñ soñuna qadar işletilmesi közde tutula. Nazir qayd etti ki, strategiyanıñ esas yonelişleri olaraq kurortlar ve turizm, sanayınıñ yañılaştırması, infrastrukturanıñ inkişafı edi.
Amma sürgün etilgenler programmasına devlet büdjetinden tek 23 mln. grivna ayırılğanı deputatlar arasında memnüniyetsizlik doğurdı. Çünki paranıñ böyle kölemi köstere ki, programma qapatılacaq, çünki sürgün etilgen vatandaşlarnıñ meselelerini çezmek içün o qadar para yeterli degil.
Qırım Yuqarı Şurasınıñ deputatı, Qırımtatar Milliy Meclis reisiniñ birinci muavini Refat Çubarovnıñ sözlerine köre, 2010-2011 senelerine Qırımnıñ iqtisadiy ve içtimaiy inkişafınıñ strategiyasında episi milletler sakinleri içün yahşı şaraitler yaratılması aqqında maddeler yoq.
Onıñ sözlerine köre, muhtariyetniñ tolu inkişafı içün, Qırımdaki episi halqlarnıñ medeniyeti ve adetlerini inkşaf etmek kerek, amma Strategiyada böyle madde yoq. “Bu aspekt olmadan Qırımnıñ inkişafı aqqında nasıl aytmaq mümkün? Strategiyada tek iqtisadiy meselelerniñ aşılmasına degil, Qırımda yaşağan bütün cemaatnıñ inkişafı içün şaraitler yaratılmasına da diqqat ayırmaq kerek”, — qayd etti Çubarov.
Çubarovnıñ sözlerini izaatlaraq, Svetlana Verba qayd etti ki, vesiqa Qırımnıñ er bir sakini içün işletildi, konkret bir milletler temsilcileri içün degil. O, qoştı ki, Qırımda milletlerara dostluqnı pekitmek içün, “Halqara ittfaqlıq” adlı mahsus programma tizilecek. Ondan da ğayrı Nazir dedi ki, teklif etilgen vesiqa soñki variant degil. Başqa teklif etilgen variantlar diqqatqa alınacaqlar.
Elmara MUSTAFA