18 mart künü Qırımtatar akademik muzıkalı-drama teatrinde qırımtatar halqınıñ belli mütefikiri, naşir ve siyasetçi İsmail Gasprinskiyniñ doğğanından 159 yıllığına bağışlanğan “Tuvğan tilim! Güzel tilim! Kene yaşa!” teatrlaştırılğan edebiy-bediy aqşam keçirildi.
Tedbirniñ teşkilâtçıları – “Qardaşlıq” qırımtatar içtimaiy teşkilâtı ve “Maarifçi” Qırımtatar tasil hadimleri assotsiatsiyasıdır. Merasimniñ musafirleri Milliy Meclis reisiniñ muavini Refat Çubarov, Cumhuriyet milletler komitetiniñ reisi Edem Dudakov, Milliy Meclisniñ tasil ve medeniyet bölüginiñ temsilcisi Safure Kacametova, Riza Yusufov ve başqaları oldılar.
Qırımtatar şiiriyeti aqşamında şairler vebalalar icrasında şiirler yañğıradı. Seyran Useinov özüniñ ana tiline bağışlanğan “Til bizim temelimiz” adlı şiirini oqudı. Tedbirniñ esas maqsadı – qırımtatar tili meselesine diqqat celp etmektir.
Teatr oyuncıları muhlisler içün halq tarafından qullanılğan ana tiline bağışlanğan teatr nomerlerni kösterdiler. Olarnıñ rejissörı Refat Seytablayev oldı. Bu yerde qırımtatarlarınıñ keçmişte, şimdiki vaqıtta laf etkenleri ve kelecekte nasıl laf etecekleri kösterildi.
Eñ büyük diqqat tilniñ yaş nesil tarafından qullanğanına celp etildi. Meselâ, nomerlerinden birinde qaraman dostunı ana tilinden olmağan sözlerini qullanğanı içün cezalay edi. Çoq yıllardan soñ, ana tilini endi yahşı bilgen dostu oña minnetdarlığını bildirdi.
Tedbirniñ ketişatında eski Qırımnıñ resimeri ile diafilm kösterildi, aynı vaqıtta qırımtatar klassikleriniñ şiirlerinden satırlar oquldı. Teatr köstermeleri arasında muhlislerni “Cemile” ve “Qırım gençler” oyun ansambllerniñ artistleri eglendirdiler.