1944 senesi 18 mayıs künü sürgünlik ve ğurbetlikte mecburen tutuluvı qurbanlarınıñ hatırasına bağışlanılğan matem mitingniñ
Rezolütsıyası
Avropa memleketleri ve avropa halqları XX asırda özlerinen sürgünlik, insanlarınıñ haq ve serbestliklerniñ bozuluvı, arbiy cinayetler ve insaniyetlikke qarşı cinayetlerni ketirgen eki qanlı- natsıst ve kommunist totalitar rejimini keçirdiler.
66 yıl evel, 1944 senesi 18 mayıs künü, qırımtatar halqına qarşı genotsıd aktı keçirildi- SSSRnıñ kommunistik rejimi yarımadanıñ tamır halqını öz Vatanından kütleviy tarzda sürgün etti.
Amma Ğarp Avropanıñ halqları ve devletleri II Cihan Cenki bitkeninden soñ, Avropa Birligine birleşip, natsıst rejimi tarafından amelge keçirilgen cinayetlerni bütünley takbih etip, onıñ aqıbetlerini yoq ettiler. SSSR dağılğan soñ Avropa Birligine Şarq Avropa memleketleri de qoşuldılar. Ukrainada ise 1944 senesi 18 mayıs cinayetli sürgünlikniñ deşetli aqibetleri bu künge qadar bile çezilmegen.Ukrainada mustaqillik devri devamında qırımtatar halqınıñ siyasiy, iqtisadiy, içtimaiy ve medeniy haqlarınıñ tiklenilmesine doğrutılğan iç bir qanun qabul olunmağan. Qırımtatar halqınıñ öz Vatanına avdet esnası daa yekünlenmedi, aileler bölüngen, on biñlernen qırımtatarlar alã daa sürgün etilgen yerlerde bulunmağa mecbur olalar. SNG azaları olğan devletler Bişkek añlaşması çerçivesinde qırımtatarlar ve olarnıñ mirascılarnıñ vatanlarına avdetlerine destek köstermek vazifelerini eda etilmelerinden çetleşkenlerinden ğayrı, bu esnasqa ep keder etmege devam etmekteler.
Ukrainada qırımtatarlarınıñ haqlarını tiklenilmesine doğrutılğan qanun olmağanı Qırımda yerli akimiyet vekilleriniñ qaytıp kelgen qırımtatarlarğa qarşı zorbalıq ve eziyet etmelerinde, olarnıñ siyasiy, maneviy, içtimaiy- iqtisadiy haqlarına diqqat etmemelerine qoltuta.
Şunı açıqtan aytmalımız ki, qırımtatarlarınıñ haqları ileride de çezilmeycek olsa, insaniyet avropa qadimiy halqlarından birisini ğayıp etmesiniñ ihtimalı bar.
Halqara ve avropa birleşmesi qırımtatarlarınıñ devam etken faciasına lãqayd qalmamalı. Qırımtatarlarınıñ haqlarını tiklenmesi ve onıñ Ukrainada havfsızlığı ve inkişafı kefaletini temin etilmesi boyunca Halqara forumnı acele sürette teşkil etmekniñ zarurlığı bar.
Biz, 2010 senesi 18 mayıs künü Aqmescitte keçirilgen Bütün Qırım matem mitingniñ iştirakçileri:
- Qırımtatarlar ögünde turğan telükeni ve kelecek nesiller içün mesüliyetlikni añlap,
- 1944 senesi 18 mayıs sürgünlikniñ qurbanlarınıñ hatırasına,
- Halqnıñ Vatanına qaytuvı ve onıñ haqlarını tiklenüvi oğrunda öz ömürlerini sarf etken qırımtatar milliy areketiniñ biñlernen faal iştirakçileriniñ cesürligine soñsuz minnetdarlığımıznı bildirip,
- XX asırları totalitar rejimleri tarafından amelge keçirilgen cinayetlerniñ aqibetlerini yoq etüvinde umumavropa ve halqara tecribege esaslanıp,
- Halqara teşkilãtlar ve eñ-evelã Birleşken Milletler Teşkilãtı(OON), Avropa Birligi, Avropada havfsızlıq ve işbirlik boyunca teşkilãtı ve Avropa Birleşmesiniñ ayrıca rolüni közge alıp,
- Qırımtatar halqınıñ haqları tiklegen ve halqlar ve insanlar haqları aqqında halqara aktlar ile tasdiqlanılğanına binaen riayet etken Ukrainanı mustaqil ve demokrtaik devlet olaraq şekillenmesini tilep,
Yaqın zamanda halqara ve avropa teşkilãtlarınıñ iştiragı ile qırımtatarlarınıñ öz Vatanlarında haqlarınıñ tiklenilmesi, onıñ Ukrainada havfsızlığı ve inkişaf kefaleti boyunca mahsus Halqara forumnıñ keçirilmesi zarur dep sayamız.
Bu aqta, biz, Bütün Qırım matem mitingniñ iştirakçileri, Qırımtatar Qurultayınıñ ve Bütündünya qırımtatar kongressiniñ delegatlarını, qırımtatar Meclisini mezkür forumnıñ azırlanılması ve keçirilmesi içün zarur tedbirler köstermelerine çağıramız.
Bütün Qırım matem mitingniñ
iştirakçileri tarafından qabul olunğan
Aqmescit, 2010 senesi, 18 mayıs.