‘Türkiye ava yolları’ aviakompaniyasınıñ Qırımdaki temsilciligi 10 yaşında.

11.05.20160:19

2009 senesi noyabrniñ 2-sinde Aqmescitte ‘Türkiye ava yolları’ aviakompaniyasınıñ Qırımdaki temsilciligi faaliyetiniñ 10 yıllığına bağışlanğan ve aynı zamanda da, şeerde kompaniyanıñ ofisi açılğanı munasebeti ile tantanalı tedbir ötkerildi.
Avropa, Aaiya, Şimaliy Afrika ve Yaqın Şarqta eñ körümli aviakompaniyalardan birisini hayırlamaq içün Qırımtatar Milliy Meclisi reisi Mustafa Cemil, Qırım Muhtar Cumhuriyetiniñ Yuqarı Şurasınıñ reis muavini Grigoriy İoffe, QMCniñ Nazirler Şurası reisiniñ muavini Tatyana Umrihina, Qırımda Türkiye Cumhuriyetiniñ fahriy konsulı Seyran Osmanov, ‘Aqmescit’ halqara aeroportınıñ müdir muavini Oleg Molçanov ve digerleri teşrif buyurdılar.
Tantanalı merasimge kelgen Türkiye ava yollarnıñ İdare Şurasınıñ muavini Hamdi Topçu öz çıqışında ‘Türkiye ava yolları’ aviakompaniyası öz uçuvlarnıñ telükesizligi, işançlığı sayesinde bir çoq insannıñ ihlâsını qazandı, dep qayd etti. Hamdi Topçunıñ bildirgenine köre, ‘Türkiye ava yolları’nıñ uçuv coğrafiyası dünyanıñ aman-aman bütün memleketlerni qaplap ala ve yaqın kelecekte Ukrainda Türkiye ava yolları ofisleriniñ açılması planlaştırıla. Öz tarafından Mustafa Cemil ‘Türkiye ava yolları’ aviakompaniyası temsilcilikleriniñ Ukraina ve Qırımda bulunması Türkiye ve Ukraina devletleri arasındaki munasebetlerge müsbet tesir etkenini qayd etti. Türkiye Ukraina mustaqilligini tanığan ve resmiy diplomatik munasebtelerini qurğan ilk devletlerden biri olğanı da hatırlanıldı. Bundan da ğayrı, Mustafa Cemil, Qırımda ‘Türkiye ava yolları’ kompaniyasınıñ ofisi bulunğanı qırımtatarlar içün ayrıca emiyetli olğanına urğuladı. Çünki tarihiy vaqialarnıñ neticesinde Türkiye devletniñ sıñırlarında al-azırda 3 millionğa yaqın semetdeşlerimiz yaşamaqta ve olarnıñ büyük qısmı Qırımdaki tuvğanlarınen bağ tutmaqtalar. Mustafa Cemil bütün Meclis adından aviakompaniyanıñ hadimlerine faal ve semereli işleri içün minnetdarlıq bildirip, muvafaqıyetler tiledi.

 

Malümat içün: 
‘Türkiye ava yolları’ aviakompaniyası 1933 senesi ava ile milliy alâqalarnı temin etmek içün meydanğa ketirilgendir.
Bugün-de-bugün Türkiye ava yollarınıñ ava flotu 116 uçaqtan ibarettir. Olarnıñ temelini Airbus ve Boeing şirketlerniñ zemaneviy uçquçları teşkil etmekte.
‘Türkiye ava yolları’ aviakompaniyasınıñ Qırımdaki temsilciligi 1999 senesi açılğan edi.
Ofisiniñ adresi: Aqmescit şeeri, Sevastopolskaya soqağı, 4.

Meclis matbuat hızmeti