Qırımtatar Milliy Meclisi reisi Mustafa Cemil ve Ukrainadaki BMT programmasınıñ daimiy temsilciliginiñ yañı başlığı Oliver Adam ve BMT QİİPnıñ halqara koordinatorı Adelina Gonay ile körüşüv olıp keçti.

11.05.20160:19

2009 senesi oktâbrniñ 1-inde meclisniñ ofisinde Qırımtatar Milliy Meclisi reisi Mustafa Cemil ve Ukrainadaki Birleşken Milletler Teşkilâtı (OON) programmasınıñ daimiy temsilciliginiñ yañı başlığı Oliver Adam ve BMTniñ Qırımnı İntegratsiya ve İnkişaf etüv Programmasınıñ (BMT QİİP) halqara koordinatorı Adelina Gonay ile körüşüv olıp keçti.
Körüşüvniñ başında O. Adam, insan aqları ve öz halqınıñ aqları oğrunda küreş saasında bütün dünyada belli liderlerden biri Mustafa Cemilnen şahsen tanışmaq ve kelecekte beraberlikte çalışmaq onıñ içün büyük şeref olğanını qayd etti. Oliver Adamnıñ fikrine köre, Qırımda amelge keçirilgen BMT programması, milliy toplulıqlar ile işbirligi saasında dünya progarammalarında eñ ileri ketkenlerden biridir.

Ukrainadaki BMT programmasınıñ daimiy temsilcisi Qırımda BMT programması boyunca leyhalarınıñ kelecekteki inkişafı aqqında öz fikirlerinen paylaşmağa, elde etilgen neticelerni talil etmege ve işbirliginiñ nevbetteki etaplarını belgilemege rica etti.
M.Cemilev ise öz tarafından eñ evelâ bütün qırımtatar halqı adından Ukrainada BMT programmasınıñ tesisçisi Stiven Braunğa öz minnetdarlığını bildirdi. ‘Onıñ teşebüssi, halqımıznıñ vaziyetini inceden ögrenüv sayesinde Qırımda BMTniñ fondunı açmağa ğayesi doğurıldı.’ — dedi Mustafa Cemilev. Meclis reisiniñ aytqanına köre, Qırımda BMT programmasınıñ faaliyet neticeleri-qırımtatarlarnıñ içtimaiy problemlerniñ al etüvinde büyük issesi bardır.
Amma aynı zamanda Mustafa Cemilev BMT QİİPniñ faaliyet devamında belli bir munaqaşalar da yer alğan edi dep qayd ete. Ayrıca, BMT QİİP leyhaları sıq-sıq yerli akimiyetniñ basımı altında acele yardımda muhtac olmağan regionlarda amelge keçirilgenini hatırlamaq mümkün. Mustafa Cemilev Qırımtatar Milliy Meclisi semereli işbirlikke azır ve elinden kelgenine qadar yardım köstereceklerini bildirdi.
Subetniñ devamında Meclis reisiniñ birinci muavini Refat Çubarov, şunı qayd etti ki, BMT QİİPniñ faaliyeti öz vatanından quvulğan halqlarnıñ integratsiyası kibi pıtraqlı meselelerniñ çezüvine doğrulğandır. ‘Programma Qırım cemiyetini terkibinde olğanlarnıñ tarafında basım duymaqtadır, amma programma qırımtatar halqınıñ inkişafı içün imkânlarnıñ iç olmağanda diger entik toplulıqlarnıñ ilerilev seviyesinde tegizlemesine şarait ile teminlemesi qatiyen müimdir’. Ondan da ğayrı, Refat Çubarov O. Adamnıñ diqqatını qırımtatarlar akimiyet organlarında kerekli dain taqdim etilmegeni ve şu sebepten qararlarnı qabul etüv esnasına tesir etmek imkânları az olğanına celp etti.
Refat Çubarov ve Meclis reisiniñ muavini Remzi İlyasov BMT QİİPniñ halqara koordinatorı Adelina Gonaynıñ faaliyetini müsbet taraftan qayd ettiler. Remzi İlyasov öz tarafından bir sıra teklifler ile çıqışta bulundı. Şu cümleden, İnsan havfsızlıq ve inkişafı Şurasınıñ yapılğan işleri aqqında esabatları Qırımnıñ bütün regionlarğa tarqatılması, Qırım Nazirler Şurasında seslendirilmesi ve devlet akimiyetiniñ merkez organlarına yollanılması zarur olğanını bidirdi. Bundan da ğayrı Remzi İlyasov şuranıñ şahsiy terkibini deñiştirmek kerekligini teklif etti ve BMT QİİPniñ yeşil etnoturizm saasında leyhalarnı amelge keçirmek teşebbüsine qol tuttı.
Qırımtatar tiliniñ ağır vaziyetine, qırımtatar tilinde mektepten evel ve mektep tasiline dair suallerniñ muzakeresi devamında O. Adam bu aqta Meclis rebeliginiñ qasevetlerini añlay ve kelecekte bu kibi problemlerni çezüv yollarını birlikte qıdırmaq kerekligine qol tutqanını bildirdi.
Körüşüvniñ soñunda ise eki taraf da biri-birine kelecekte de kerek olğan vaqıtta problem, qasevet ve ihtiyaclarınen paylaşmaq niyetlerini bildirdiler.

 

Meclisniñ matbuat hızmeti