Mustafa Cemilev Meclis ofisinde Kanada Parlamentiniñ deputatı Boris Vjesnevskiyni onıñ ricası ile qabul etti.

11.05.20160:19

2010 senesi 10 avgust künü Qırımtatar Milliy Meclisniñ Reisi, Ukraina halq deputatı Mustafa Cemilev Meclis ofisinde Kanada Parlamentiniñ deputatı Boris Vjesnevskiyni onıñ ricası ile qabul etti.

Meclis Reisinen sübetinde Kanada siyasetçisi añlattı ki, Qırımda bulunırken, Mustafa Cemilev kibi belli siyasetçi ve uquqqoruyıcısınen tanışmaq imkânını qullanmağa aşıqtı. “Öz vaqtında men dostuñız Vâçeslav Çernovolnen yaqın tanış edim, — M.Cemilevge muracaat eterek, tarif etti B.Vjesnevskiy. O vaqıt, Çornovolnen sübetlerde men birinci kere qırımtatar halqı aqqında, onıñ ağır taqdiri ve öz aqları tiklenilüvi içün küreşleri aqqında bildim”.

Kanada ukrainlerniñ üçünci nesil temsilcisi olğan Kanada siyasetçisi Meclis Reisi Mustafa Cemilevge Kanadanı ziyaret etmege tekklifinen muracaat etti, anda, belli olğanı kibi, tamır halqlar ve milliy azlıqlarğa qol tutuv boyunca mahsus devlet siyaseti alıp barıla. “Eminim ki, Kanada cemaatçılığına qırımtatarlarnıñ aqları tiklenilüvi içün küreşlerinde tek demokratik usullarnı qullanğan qırımtatar milliy areketiniñ tecribesi aqqında bilmege pek meraqlı olur. Bu munasebet ile, biz ziyaret programması azırlanuvı boyunca yardım ete bilemiz, qırımtatar halqı lideriniñ Kanadanıñ belli siyasetçiler ve cemaat erbaplarınen, Kanadanıñ tamır halqları temsilcilerinen körüşüvler, bir sıra brifingler ve press-konferentsiyalar közde tutula”, — haber etti Boris Vjesnevskiy.

 

Boris Vjesnevskiyge Kanadanı ziyaret etmek teklifi ve ziyaret teşkilinde yardım etmek azırlığı içün minnetdarlıq bildirip, Mustafa Cemilev, öz nevbetinde, Kanada Liberal partiyanıñ azasını Qırımtatar Milliy Meclisniñ yaqın vaqıtta Qırımtatar halqı aqlarınıñ öz Vatanlarında tiklenüvi, Ukrainada havfsızlığı ve inkişaf kefilliginiñ teminlevi sualleri boyunca Halqara forum keçirilüvi ğayesinen tanış etti.

“Bu forumğa biz BMT, PASE, AB, OBSY, Avropa halqlarınıñ federal birligi, ve başqa müim halqara teşkilâtlarnıñ resmiy temsilcilerini ve dünyaca belli siyasiy ve cemaat erbaplarını davet etmege planlaştıramız, — haber etti Mustafa Cemilev, ve qoştı ki, Halqara forumnıñ azırlanuvı ve keçirilmesi aqqında sualler Qurultaynıñ sualler cedveline kirsetildi, Qurultay ağımdaki seneniñ 28-29 avgust künlerinde keçirilecek. Bu sual sessiyanıñ kün tertibinde esas sualleirnden biri olacaq”. Kanada deputatı, öz nevbetinde, öyle yüksek seviyede kecirilmesi köz ögünde tutulğan tedbir aqqında seslenilgen ğayege musbet qıymet kesti, ve öz tarafından yardım etmek teklifini bildirdi.

Körüşüvde V çağıruv Qırımtatar halqınıñ qurultayınıñ delegatı Egiz Abduraman da iştirak etti.

Qırımtatar Milliy Meclisniñ Matbuat hızmeti